प्रतिनिधिसभा पुनःस्थापन सर्वोच्चया फैसला विषयस प्रचण्ड, माधवलिसें नेतापिन्स बिउगु प्रतिक्रिया
सिल्लाथ्व द्धादशी ११४१, फागुन १२ बुधवाः
प्रतिनिधिसभा पुनःस्थापना यायेगु सर्वोच्चया फैसलायात थीथी राजनीतिक दलं लसकुस याःगु दु । प्रधानमन्त्री ओली पक्ष बाहेक मेमेगु दलं फैसलायात लसकुस याःगु दु ।
इमिसं सर्वोच्चं संविधानया रक्षा याःगु अले देय्यात राजनीतिक दुर्घटना मजुइकूगु धागु दु । नेकपा दाहाल–नेपाल पुचःया नायः पुष्पकमल दाहाल प्रचण्डं सर्वोच्चया फैसलां देय्यात ख्यूंगु सुरुङय् मछ्वःगु धयादीगु दु ।
चितवनय् दुम्ह प्रचण्डं प्रधानमन्त्री ओलीया राजिनामा तकं फ्वनादीगु दु । प्रधानमन्त्री ओलीयाके छुं भतिचा जक न लाज दुसा नैतिकताया लिधंसाय् राजीनामा बीत प्रचण्डं छ्याता बियादीगु दु ।
अथेहे, नेकपाया हे मेम्ह नायः माधवकुमार नेपालं सर्वोच्चया फैसलां लोकतन्त्र व नेपाली जनता त्याःगु धयादिल । अदालतं लोकतन्त्रयात त्याकेब्यूगु धयादीगु दु ।
चितवनय् दुपिं नेता नेपाल व प्रचण्डं फैसलालिपा छम्हेसिनं मेम्हेसित लड्डु नकाः लसता प्वंकूगु खः ।
यस्तै प्रमुख प्रतिपक्षी दल नेपाली कांग्रेसं न सर्वोच्चया फैसलायात लसकुस याःगु दु । काँग्रेस सभापति शेरबहादुर देउवां ट्वीट यानाः थःम्हं सुरुनिसें संसद् विघटनय् सर्वोच्चयात स्वतन्त्र रुपय् फैसला यायेबीमागु उल्लेख यानादीगु खः ।
संविधान कार्यन्वयनया झ्वलय् खनेदुगु कचवं ज्यंकेगु लिपांगु थाय्या कथं सर्वोच्च अदालत दुगु न वय्कलं धयादिल ।
सभापति देउवां सर्वोच्चं विघटन बदर यानाः संवैधानिक दायित्व पूवंकूगु उल्लेख यानादीगु दु । प्रतिनिधिसभाया सभामुख अग्नि सापकोटां जनताया व संविधानवादया जीत जूगु प्रतिक्रिया बियादीगु दु ।
सर्वोच्च अदालतं प्रतिनिधिसभा विघटन यायेगु सरकारया निर्णययात बदर यायेधुंकाः प्रतिक्रिया ब्युसें वय्कलं सर्वोच्चया फैसलां संविधानवादया जीत जूगु धयादिल ।
सभामुख सापकोटां प्रतिनिधिसभा विघटन यायेगु प्रधानमन्त्री केपी शर्मा ओलीया निर्णयायत बदर यायेगु सर्वोच्चया फैसलां राज्यया महत्वपुर्ण अंगतय् शक्ति पृथकिकरण व भूमिका बारे नं स्पष्ट मार्ग निर्देश याःगु धयादिल ।
नेपाली कंग्रेसया महामन्त्री डा. शशांक कोइरालां सर्वोच्च अदालतं नेपाली जनतायात न्याय बिउगु टिप्पणी यानादीगु दु । न्यायालयं पञ्चायतया कालरात्रीइ नं बीपी कोइराला, गणेशमानसिंह लिसेंया दर्जनौं नेतायात न्याय बिउगु खः ।
उगु हे जगय् थौं हाकनं न्याय चूलागु महशुष जूगु वयेधया धापू दु । आः च्वनिगु संसद मुँज्याय् प्रधानमन्त्रीं राजीनामा बिया सहज राजनीतिक वातावरणया नितिं लँपू प्रशस्त यायेमाःगु वयेकया छ्याता दु ।
नेपाली कंग्रेस थुगु इलय् सरकारय् वनेगु सिवें पिने हे च्वना न्हूगु दयेकिगु सरकारयात ग्वहालि यायेगु पायेछि जुइगु थःगु व्यक्तिगत विचाः दूगु वयेकलं न्ह्यथनादील ।
सर्वोच्च अदालतया पूर्वन्यायाधीश बलराम केसीं प्रतिनिधिसभा विघटनसम्बन्धी सर्वोेच्च अदालतया फैसला याःपिं न्यायाधीशपिन्त ‘स्यालुट’ यायेमाःगु धयादीगु दु ।
पूर्वन्यायाधीश केसीं संविधान डिरेल जुइगु अवस्था दुगुलिइ बल्ल ट्र्याकय् वःगु टिप्पणी यानादिल । वय्कलं सर्वोच्चया फैसलायात लसकुस यायेमाःगु धयादिल ।
प्रधानमन्त्री केपी शर्मा ओलीं थःके पावर दु धकाः घमण्ड याःगु धासें वयकःया घमण्ड फूगु धयादिल । पूर्वन्यायाधीश केसीं सर्वोच्चया फैसलाया हलिंन्यंक तारिफ जुइगु धयादिल ।
