आन्दोलनकारीतय्सं सतकय् हे जा थुया नल, सर्वसाधारणपिन्त सास्ती
पोहेलागा सप्तमी ११४१, माघ २२ बिहीवाः
प्रतिनिधिसभा विघटन व संवैधानिक आयोगय् नियुक्तियात कया नेपाल कम्युनिष्ट पार्टी प्रचण्ड–नेपाल पुचलं थौ देय्यंक आमहड्ताल यानाच्वंगु दु ।
गृह मन्त्रालयं हड्तालय् नं सवारी ज्वलं न्ह्याकेत यातायात व्यवसायीयात निर्देशन ब्यूसां सडकय् यातायातया ज्वलंत म्ह्वः हे ल्याखय् न्ह्याःगु दु ।
हड्ताल ताःलाकेत सुथंनिसें हे कार्यकर्तात सडकय् कुहांवःगु दुसा तःधंगु ल्याखय् सुरक्षाकःमि परिचालन जूगु दु । छुं थासय् कार्यकर्ता व प्रहरी दथुइ घम्साघम्सी जूगुु दु । सडकय् टायर च्याकाः प्रदर्शन याःपिं कार्यकर्ता व प्रहरी दथुइ थाय्थासय् घम्साघम्सी जूगु दु । सुथंनिसें हे छुं थासय् आन्दोलनकारीतय्त सुरक्षाकःमिं धरपकड याःगु नेकपा दाहाल–नेपाल पुचलं न्ह्यथंगु दु ।
सतकय् आन्दोलन यानाच्वंपि नेता व कार्यकर्ता कनी, बजी नयाँ आन्दोलन यानाचवंगु दु धाःसा कोटेश्वरय् आन्दोलनकारी त सतकया दथुई हे जा थुया नल ।
गुलिस्यां जा थुयाच्वंगु खः सा गुलिं तरकारी देयेकेगु ज्याय् लिमलाःगु खनेदु । थथे सतकया दथुई हे जा थुया नयाँच्वंपिन्त प्रहरीं दिकेत स्वबलय् आन्दोलनकारी व प्रहरी दथुई छुं ई घम्साघम्सी तकं जूगु खः ।
म्हिगः राष्ट्रपति विद्यादेवी भण्डारीं संसदीय सुनुवाई विना हे संवैधानिक परिषदं सिफारिस याःपिं संवैधानिक आयोगया पदाधिकारी अले दुजःपिं नियुक्त यायेधुंकाः दाहाल–नेपाल पुचलं आकस्मिकरुपं हड्ताल घोषणा याःगु खः ।
थ्व लिसें संसद विघटनविरुद्ध घोषणा याःगु स्वंगूगु चरणया आन्दोलनया ज्याझ्वः धाःसा छुं ह्यूगु दु । माघ २३ गते केपी ओली पुचलं येँय् शक्ति प्रदर्शन यायेत्यंगु दु ।
उकिया लागिं पिने जिल्लां वइपिं कार्यकर्ता पनेत नं हड्ताल याःगु ओली पक्षया द्वपं दु ।
किपाः सामाजिक सञ्जाल
