कर्णाली प्रदेशय् एमालें सरकारयात बिउगु समर्थन लितकाल, बागमती प्रदेशय् अविश्वास प्रस्ताव लितकाल
चिल्लागा तृतीया ११४१, चैत्र १८ बुधवाः
नेकपा एमालें समर्थन फिर्ता लितकाःगु नापं कर्णाली प्रदेशया मुख्यमन्त्री महेन्द्रबहादुर शाहीयात सरकार ल्यंकेत थाकुगु दु । नेकपा माओवादी केन्द्रया नेता तकं दीम्ह मुख्यमन्त्री शाहीं आः प्रदेश सभा मुँज्यां विश्वासया मत कायेमाःगु जूगु दु ।
अथेहे संकेत यासें प्रदेश प्रमुख गोविन्दप्रसाद कलौनीं मुख्यमन्त्री शाहीयात पौ छ्वया ध्यान सालाकादीगु दु । मुख्यमन्त्री शाहीयात बिउगु समर्थन थ्वहे चैत ४ गते लितकाःगु एमालेया हे ओली पुचःलं धाःगु खः ।
तर लिपांगु ई एमालेया खनाल नेपाल पुचःलं नं सरकार क्वदलेत सहमति न्ह्यथंगु स्रोत धाःगु दु । प्रदेश प्रमुखया ज्याकुथिं उकिया कन्हय्कुन्हु चैत ५ य् पौ छ्वसें मुख्यमन्त्री शाहीयात भलसाया मत कायेत धाःगु खः ।
संविधानया धारा १८८ या २ कथं सरकारय् दूगु दल ब्वथःसा वा समर्थन याःगु दलं समर्थन लितकाःसा उकिया ३० न्हू दुने मुख्यमन्त्रीं विश्वासया मतया नितिं प्रदेश सभाय् प्रस्ताव यायेमाःगु व्यवस्था दु ।
प्रदेश सभाय् कायम दूगु दुजःया बहुमत चूलासा जक मुख्यमन्त्री शाही नेतृत्वया सरकार कायम जुइ । प्रदेश प्रमुखं १२न्हू लिपा हाकनं मुख्यमन्त्रीयात पौ छ्वया विश्वासया मत कायेत ध्यान सालेधुंका नेपाल पुचःया सांसदं नं समर्थन लितकयाःगु संकेत बिउगु दु । कर्णालीइ सरकार दयेकेत २१ म्ह सांसद माःगु दु ।
नेकपा एमालेय् २०म्ह सांसद दु । उमित सरकार दयेकेत मेगु छुं छगू दलं समर्थन बिइमाः । अथेहे माओवादीया १३म्ह सांसद दु । नेपाली कांग्रेसया ६म्ह व राप्रपाया छम्ह सांसद दु । एमालेयात न्हूगु सरकार दयेकेत राप्रपाया समर्थन चूलासा माक्वः जुइ ।
थुखे बागमती प्रदेशया मुख्यमन्त्री डोरमणि पौडेलविरुद्ध अविश्वासया प्रस्तावय् ल्हाचिं तःपिं एमाले सांसदपिन्सं नाँ लित कासेंलि अविश्वास प्रस्ताव लितकाःगु दु ।
माधव नेपाल पुचःया सांसदपिं नाँ लितकायेधुंका अविश्वासया प्रस्ताव लिछ्याःगु खः । थ्वयांन्ह्य वंगु पुस १० गते नेकपा माओवादीया २३म्ह व नेकपा एमालेया हे २२म्ह सांसदपिन्सं ल्हाचिं तया मुख्यमन्त्री पौडेलयात अविश्वासया प्रस्ताव प्रदेशसभा सचिवालयय् दर्ता याःगु खः ।
