चेल्सी, म्यान सिटी र टोटनह्याम प्यंगूगु थासय्
डंगोल | त्रयोदशी थिंलागा ११४१ (२०७७ पौष २७ गते) सोमबाः
प्रिमियर क्लबत चेल्सी, म्यान्चेस्टर सिटी व टोटनह्याम हट्सपर एफए कप फुटबल धेंधेंबल्लाया ४गूगु झ्वलय् थ्यंगु दु ।
वंगु चान्हय् जूगु ३गूगु झ्वया कासाय् च्याम्पियनसिप क्लब बर्मीङ्घम सिटीयात ३–० या गोल अन्तरं बुका म्यान्चेस्टर सिटी ४गूगु झ्वलय् थ्यंगु खः ।
सिटीया शीर्ष कासामि सर्जियो अगुएरोयात कोरोना संक्रमण जुइधुंका थ्व कासा त्वफिकुगु खः ।
अगुएरोया अनुपस्थितिइ म्यान सिटीयात त्याकेत बर्नार्डो सिल्भां निगू लिसें फिल फोडेनं छगू गोल याःगु खः ।
एफए कपया हे मेगु कासाय् लिग टु या मोरेक्याम्बेयात ४–० या गोल अन्तरं बुका चेल्सी ४गूगु झ्वलय् थ्यंगु दु ।
चेल्सी त्यागुलिइ टिमो वेर्नर, मेसन माउन्ट, क्यालम हड्सन ओडोई व काइ हाभर्ट्जं छगू छगू गोल याःगु दु ।
वंगु चान्हय् जूगु मेगु कासाय् मरिन एसोसिएसन फुबल क्लबयात ५–०या गोल अन्तरं बुका टोटनह्याम हट्सपर नं ४गूगु झ्वलय् थ्यंगु दु ।
कासाय् टोटनह्यामयात त्याकेत कार्लोस भिनिसियसं ह्याट्रिक याःबलय् लुकास मौरा व डेभिनें छगू छगू गोल याःगु खः । वंगु चान्हय् लिड्स युनाइटेडयात धाःसा क्रले टाउन एफसीं ३–० लिं बुकुगु दु ।
Categorized in कासा
