च्याम्पियन्स लिग फुटबलय् लिरभपुलं बुकाबिल लेप्जीगयात, बार्सिलोनायात पीएसजीं बांमलाक्क बुकाबिल
सिल्लाथ्व षष्ठी ११४१, फागुन ५ बुधवाः
युरोपियन च्याम्पियन्स लिग फुटबलय् फ्रान्सया पेरिस सेन्ट जर्मेन (पिएसजीं) स्पेनया बार्सिलोनायात ४–१ गोलं बुकूगु दु ।
वंगु चान्हय् बार्सिलोनाया ख्यलय् जूगु राउण्ड अफ सिक्सटिनया न्हापांगु लेगया कासाय् पाहां टोली पीएसजीया लागिं किलियन एम्बाप्पें ह्याट्रिक याःबलय् मोइज किनं १ गोल यात ।
बार्साया लागिं कप्तान लियोनल मेस्सीं पेनाल्टीपाखें न्हापांगु गोल याःगु खः । न्हापांगु लेगय् तब्यागु हार फःगुलिसें बार्सिलोना निगूगु लेग न्ह्यः दबाबय् लाःगु दु ।
राउण्ड अफ सिक्सटिनया हे मेगु कासाय् इंग्ल्याण्डया लिभरपुलं जर्मनीया आरबी लेप्जीगयात २–० गोलं बुकूगु दु । जर्मनीइ जूगु कासाय् लिभरपुलयात त्याकेत मोहोमद सालाह व सादियो मानें १÷१ गोल यात ।
च्याम्पियन्स लिग फुटबलय् थौं चान्हय् निगू कासा जुइ । थौं पोर्चुगलया एफसी पोर्टों इटालीया युभेन्टसलिसे म्हितीबलय् स्पेनया सेभिया व जर्मनीया बोरुसीया डर्टमण्ड चुलिंचू लाइ ।
Categorized in कासा
