भलिबल टिमया कप्तान शाहीयात ‘पिपल्स च्वाइस अवार्ड’
डंगोल | चर्तुदशी, थिंलागा ११४१ (२०७७ पौष २८ गते) मंगलबाः
राष्ट्रिय भलिबल टिमया कप्तान अरुणा शाहीं ‘एनएसजेएफ पल्सर स्पोर्ट्स अवार्ड’ अन्तर्गतया पिपल्स च्वाइस अवार्ड त्याकेत ताःलागू दु ।
जनताया मत लिसें राष्ट्रिय खेल संघया मू प्रशिक्षक व नेपाल खेलकुद पत्रकार मञ्चया दुजःया मतपाखें अरुणां पौडीया गौरिका सिंह, कराँतेया मन्देकाजी श्रेष्ठ, बास्केटबलया सदिना श्रेष्ठ व फुटबलया सावित्रा भण्डारीसि लिपालाकूगु खः ।
मन्देकाजीं उत्कृष्ट वर्ष पुरुष खेलाडीया अवार्ड त्याकल । अथेहे १३ क्वःगु दक्षिण एसियाली खेलकुद सागय् निगू लुँया तक्मा त्याकेत ताःलाम्ह मन्देकाजीं अवार्ड त्याकूगु दु ।
१३क्वःगु सागय् ४ लुँया तक्मा लिसें ९गू तक्मा त्याकेत ताःलाम्ह पौडीया गौरिका सिंहं थुगुसीया वर्ष उत्कृष्ट महिला खेलाडीया अवार्ड त्याकल ।
गौरिकां कराँतेया अनु अधिकारी, तेक्वान्दोया आयशा शाक्य, एथ्लेटिक्सया सन्तोषी श्रेष्ठ व ट्रायथलनया सोनी गुरुङया लिपा लाका अवार्ड त्याकेत ताःलागू खः ।
अथेहे वर्ष उत्कृष्ट युवा खेलाडी गल्फर सुवास तामाङं, धाविका सन्तोषी श्रेष्ठ व तेक्वान्दो कासामी आयशा शाक्यं स्पेशल अवार्ड त्याकेत ताःलागू दु । निम्ह सन्तानया माँ आयशां सागय् निगू लुँया तक्मा त्याकेत ताःलागू खः ।
अथेहे नेपाली राष्ट्रिय महिला भलिबल टिमं “टिम अफ दि इयर”या अवार्ड त्याकेत ताःलागू दु । दँया उत्कृष्ट प्रशिक्षकया अवार्ड तेक्वान्दो स्यःनामि नविनकुमार श्रेष्ठं त्याकूगु दु ।
पारा कासामी डिगम सिंह चेम्जोङले पारा एथलिट सम्मान काःगु दुुसा पूर्व टेबलटेनिस कासामी गीता क्षेत्री व सिजरिन शाहपिन्त “लाइफटाइम एचिभमेन्ट अवार्ड” ब्यूगु दु ।
मलेसियाया खेल पत्रकार अहमद खवारी इशायात एसियन स्पोर्ट्स जर्नालिस्ट अवार्ड ब्यूगु दु ।
नेपाल खेलकुद पत्रकार मञ्चं स्थापनाया २५दँ थ्यंगु लसताय् १७क्वःगु स्पोर्टस् अवार्ड न्ह्याःगु खः ।
कोरोनाया हुनिं सेमी भर्चुअलया लिधंसाय् उगु ज्याःभ्mव जूगु खः ।
Categorized in कासा
