२०८० चैत्र ६, मंगलबार

दिगु तलेजुइ पुरूषाेत्तम राजाेपाध्याय मूल पूजारी नियुक्त

लहनान्यूज सम्वाददाता | ने.सं. ११४१ चिल्लाथ्व अष्टमी (२०७७ चैत्र ८)

येँया दिगु तलेजुइ मूल पूजारी नियुक्त जूगु दु । वंगु कार्तिकनिसें खालि जुयाच्वंगु मूल पूजारीइ येँया मखनय् च्वंम्ह द्यःबाज्या पुरुषोत्तम सुवेदी राजोपाध्याययात नियुक्त याःगु खः ।

शनिबाः दिगु तलेजुया सहायक पूजारी नारायणमान जोशीं स्वांमाः क्वखायेकाः न्हूम्ह नियुक्त मूल पुजारी पुरुषोत्तम सुवेदीयात दिगु तलेजु देगलय् दुकाःगु खः । दिगु तलेजुया सहायक पूजारी जोशी थकाली पुष्पमान जोशीया अनुपस्थितीइ नारायणमान जोशीं सुवेदीयात दिगु तलेजुइ दुकाःगु खः । सहायक पूजारी मदनराज जोशीया कजिसुइ मूल पूजारी दुकायेगु ज्या जूगु खः ।

मूल पूजारी सुवेदीं शनिबाःनिसें हे नित्य पूजा नं न्ह्याकादीगु दु ।

वंगु कार्तिक १९ गते दिगु तलेजुया तत्कालीन मूल पूजारी नारायण राज सुवेदी राजोपाध्याय मदयेधुंकाः मूल पूजारी पद रिक्त जुयाच्वंगु खः । थनया पूजा दिक्षा दुम्ह द्यःबाज्या राजोपाध्यायं हे यायेमाःगु जुयाः मूल पूजारी पद रिक्त जुयाच्वंगु खः । मूल पूजारी मदुबलय् थनया नित्य पूजा सहायक पूजारी जोशीतपाखें पूजा जुयावःगु खः ।

‘दिक्षा दुम्ह मूलपूजारी मदयाच्वंगु अवस्थाय् समस्या जुयाच्वंगु खनी, थःगु पुर्खां न्ह्याकावःगु परम्परायात निरन्तरता बीत थम्हं छुं योगदान बी खनाः लयतायाच्वना’ मूल पूजारी सुवेदीं धयादिल ।

दिगुतलेजु मल्ल जुजुतय् कुलदेवीया रुपं काइ । न्हापा नित्य पूजाया झ्वलय् जुजुपिं थः हे उपस्थित जुइगु धयातःगु दु । येँया हनुमानध्वाखास्थित तलेजु देगः पिने प्रतापमल्लया स्तम्भया न्ह्यःने हाथुद्यः नापं दिगु तलेजुया प्यागोडा शैलीया ६२ कु तजाःगु कलात्मक देगः दु ।

भाषा वंशावली कथं थुगु देगः जुजु शिवसिंह मल्लं दयेकूगु खः । लिपा वि.सं. १७२७ भाद्रय् जुजु प्रताप मल्लं थुगु देगलय् लुँया पौ व गजू तयाः देगः जीर्णोद्धार याःगु खः ।

कुलदेवता वा देवीयात बिस्कं हे कोथाय् तयाः पूजा यायेगु प्रचलन दु । कुलदेवता दुगु देगलय् न्ह्याम्हं दुहांवने मदइगु नियम दइ व कुलदेवता वा देवीया पूजा गुप्त रुपं यायेगु याइ । येँया दिगुतलेजुया हे अनुकरण यानाः यलय् जुजु सिद्धिनरसिंह मल्लं वि.सं. १६९७ फागुनय् दिगुतलेजु देगः दयेकूगु खः ।

Categorized in राष्ट्रिय