छम्हेसिनं धयाच्वन, देय् निर्वाचनमय जुल, निर्वाचनया तयारी जानादिसँ । हाकनं मेम्हेसिनं धाल, संसद विघटन असंवैधानिक खः, संसद पुनस्र्थापना जुइ, चुनाव जुइमखु ।

दक्वसिया थःथःगु हे जक खँ । वं वयात गलत धाल, वं वयात गलत धाल । थःगु गलती सुनां खनीगु हे मखु । मेपिनिगु गलती क्यनेगु अले थः भिं जुइगुलिइ सकलें मख्ख । उलि जक मखु, देशया विकास याय् धकाः तःधंगु संकल्प कयाः नेतृत्व कयाच्वंपिं, देशया प्रमुख प्रमुख ओहदाय् च्वनाच्वंपिं वं वयात वं वयात लाक्वपाक्व धयाः ब्वः बिया जुजुं हे लाःगु मखु । देशय् ततःधंगु राजनीतिक परिवर्तन जुल ।

पंचायती व्यवस्थायात क्वथलाः बहुदलीय व्यवस्था वल । छगू परिवारं सारा देशवासीयात शासन याइगु राजतन्त्रयात क्वथलाः जनतां शासन याइगु गणतन्त्र वल । थज्याःगु राजनीतिक परिवर्तन हय्गु नितिं छधी जुयाः छगू शक्ति जुयाः दनीगु, परिवर्तनया नितिं नेतृत्वदायी भूमिका म्हितीगु राजनीतिक दलतय्सं लिपा वयाः छाय् थथे अपरिपक्व जक मखु, असामाजिक प्रवृत्ती हे क्यनी ?

न्हापा जूसा ला छगू दल व मेगु दलया ल्वापुया खँ वइगु । आः दलत ल्वा जक ल्वाल्वां थुलि ल्वाय्त अभ्यस्त जुइधुंकल कि मेगु दललिसे मखु, आः थःगु हे दल दुने थः थः नं ल्वाय् सय्धुंकल । स्वयादिसँ, न्हापा एमाले व माओवादी निखे, प्रचण्ड व ओली गबलें नं नापं दनेफुपिं हे मखु थें । जुजुं थ्व निगुलिं पार्टी छधी जुल । छुं ई ला ओली व प्रचण्ड शोले प्याखंया अमिताभ बच्चन व धर्मेन्द्र थें जुल ।

तर आः वयाः हाकनं खिचा व भौचा ल्वाय् थें । आः वयाः प्रचण्ड व ओली जक मखु, एमालेया हे ओली छखे, माधव व झलनाथ मेखे । अले प्रचण्ड छखे, बाबुराम जसपाय्, रामबहादुर थापा बादल ओलीपाखे । कम्यूनिष्ट पार्टी टुक्रा जक जुइसःपिं धाइगु । आः ला काँग्रेस नं कम मखय्धुंकल । संस्थापन पक्ष व विपक्षया विवाद ला न्हापा नं मदुगु मखु, तर आः वयाः शेरबहादुर व रामचन्द्र दथुइया कलह नं ओली प्रचण्डया हे लँपुइ मलाई धाय् मफय्धुंकल ।

थःथः ला मिलेचले जुयाः ज्या यानाः क्यनेमफु । जनतां थुमित गथे विश्वास याय्गु ? गुकथं थुमिसं देशया विकास याइ धाय्गु ? थज्याःगु अहम्, रिस, राग त्वःताः परिपक्व जुइगु खः कि थथे ल्वानाः सकसिगु न्ह्यःने थःगु ईज्जत वांछ्वयाच्वनेगु धकाः नेता धाःपिन्सं बिचाः याय्माःगु खः । आः वयाः नेतां बिचाः मयाय्गु खःसा जनतां ला बिचाः याय् माले हे धुकल ।