२०८१ आषाढ ७, शुक्रबार

राजोपाध्याय म्ये कासाय् सक्षम न्हाप

लहनान्यूज सम्वाददाता | ने.सं. ११४४ कछलाथ्व चतुर्दशी (२०८० मंसीर १०) आइतबाः

लकडाउनया हुनिं जुइमफयाच्वंगु राजोपाध्याय म्ये कासा अन्ततः स्वदँ लिपा जूगु दु । शनिबाः यलय् राजोपाध्याय गायन कासा क्वचाल ।

कासाय् सक्षम शर्मा राजोपाध्याय न्हाप लात । अथे हे, सुभिया राजोपाध्याय ल्यू व सौरभ राजोपाध्याय लियांल्यू लात ।

त्याकामि स्वम्हेसितं निर्णायक मण्डलया दुजः कलानिधि इन्दिरा संगीत महाविद्यालयया प्रिन्सिपल, वरिष्ठ म्येहालामि धनबहादुर गोपालीं ट्रफि लःल्हानादिल ।

तका सिरपाः धाःसा पुष महिनाय् जुइगु समाजया दँमुँज्याय् लःल्हायेगु समाजया नायः संजय शर्मा राजोपाध्यायं जानकारी बियादिल । न्हाप, ल्यू व लियांल्यू लाःपिन्त छसिकथं झिद्वः तका, न्हय्द्वः तका व प्यद्वः तका सिरपाः बीगु समाजं धाःगु दु ।

निर्णायक मण्डलया दुजः वरिष्ठ म्येहालामि गोपालीं त्याकामिपिनिगु नां घोषणा यासें थः मस्तयत कला क्षेत्रय् न्ह्याःवनेत हःपाः बीत अभिभावकतयत इनाप यानादिल ।

‘कला क्षेत्रयात स्वयेगु मिखा आः पाः, थुगु क्षेत्र सम्मानया ल्याखं जक मखु, आर्थिक ल्याखं पाः । थः मस्तयत थ्व क्षेत्रय् न्ह्यज्याकादिसँ’ गोपालीं धयादिल ।

निर्णायक मण्डलय् गोपालीलिसें संगीत संयोजक, क्लासिकल गितारिस्ट भुपेन्द्र बज्राचार्य व नेपालया न्हापांम्ह हवाइन गितारिस्ट ईश्वर जोशी दुगु खः ।

ज्याझ्वलय् म्येहालामि सुरजबीर बज्राचार्य, संगीत संयोजक लिसें म्येहालामि भुपेन्द्र बज्राचार्यं म्ये हालादीगु खः । लिसें मुनिन्द्र ज्वालानन्द राजोपाध्याय व विनित ज्वालानन्द राजोपाध्यायं सारंगी व बाँसुरी वादन न्ह्यब्वयादीगु खः ।

ज्याझ्वः कजि लिसें समाजया संस्थापक नायः बदन ज्वालानन्द राजोपाध्यायं कासाया लागिं २०७६ फागुन १७ गते हे क्वचाःगु खःसां कोरोना महामारी, डेंगुया प्रकोपलिसें थीथी हुनिं फाइनल कासा लिबाःवंगु जानकारी बियादिल ।

Categorized in मनोरन्जन