इमेज च्यानल टेलिभिजनया समयबजिया ज्याझ्वःया लोकंव्हाःम कलाकार कलाकार रेवन्त लाल श्रेष्ठं हालातःगु म्ये ‘ह्याउँ ख्वाः मिसा’ या म्युजिक भिडियो सार्वजनिक जूगु दु । वंगु आइतबाः येँय् जूगु ज्याझ्वलय् वरिष्ठ म्येहालामि जुजुकाजि रन्जितं म्येया भिडियो सार्वजनिक यानादिल ।

नेपालभाषाया न्हापांम्ह म्युजिक भिडियो निर्देशक विजयरत्न असंबरें पितब्वज्या जूगु म्यूजिक भिडियोया समीक्षा यासें म्ये ख्यालि न्हिलां जाःगु म्येया भिडियो च्वछायेबहजूगु धयादिल । ज्याझ्वलय् उगु म्ये भिडियोया परिकल्पनाकार व निर्देशक सुरेन्द्र मानन्धरं लसकुस न्वचु तयेगु झ्वलय् सकसिया कुतलय् छपु बांलाःगु म्ये पिहांवःगु धयादिल । नेवाः पत्रकार राष्ट्रिय दबूया नायः सुरजबीर बज्राचार्यं नं भिन्तुना न्वचु तयादीगु खः । 

पितब्बज्या जूगु म्येया म्येग्वः लय् विष्णु जल्मियागु खःसा बाजं ग्वसाः जिवित जल्मिं यानादीगु दु । छायाङ्कन आयुष महर्जनं यानादीगु दुसा सम्पादन इन्द्र मानन्धरं यानादीगु दु ।

भिडियोस म्येहालामि रेवन्त लाल श्रेष्ठं लिसें रबिता बके श्रेष्ठ, सना शाक्य, सुरेश मानन्धर, दिब्यरत्न बज्राचार्य, लक्ष्मीनाथ मोदगलिया व सुरेन्द्र मानन्धरं अभिनय यानादीगु दु ।

Categorized in मनोरन्जन