२०७८ आश्विन ९, शनिबार

मकवानपुरया मनहरीइ सवारी दुर्घटना जुया ३म्ह सीत, १०म्ह घाःपाः

सिल्लागा आंैसी ११४१, फागुन २९ सनिवाः

पूर्वपश्चिम राजमार्गअन्तर्गत मकवानपुरया मनहरी–६ सुनाचुरीइ सवारी दुर्घटनाय् ३म्ह सीगु दु । रात्रीबस व ट्रक थःथःवय् न्याना जूगु दुर्घटनाय् १० म्ह  घाःपाः जूगु दु ।
 
शनिबाः सुथय् हेटौंडां चितवन वनाच्वंगु ना४ख ५१४९ ल्याःया बस  अःखः दिशां वयाच्वंगु  ना६ख ८९ ल्याःया  ट्रक थःथःवय्  न्यागु खः ।
 
दुर्घटनाय् बसया चालक वीरगञ्ज महानगरपालिका–१५ या ३५ दँया मदनकुमार थापा, बसय् सवार भारत सिस्वाया अन्दाजी ३५दँ÷४०दँया अभयलाल कुश्वाह व बिहारया ४०दँया सुनिल कुमार सीगु जिल्ला प्रहरी ज्याकु मकवानपुरं  न्ह्यथंगु दु ।
 
बस चालक थापा व सुनिल कुमार वासः यायेगु  झ्वलय् चितवनस्थित पुलांगु मेडिकल कलेज व कुश्वाह हेटौंडा अस्पतालय् वासः यायेगु झ्वलय् सीगु प्रहरीया धापू दु ।
 
दुर्घटनाय् बस व ट्रकय् सवार घाःपाः जूपिं १०म्हसिया हेटौंडाय् व भरतपुरय् वासः जुयाच्वंगु प्रहरीं न्ह्यथंगु दु । 
 
थुखे , बाँकेया  राप्ती सोनारी गाँपालिका–३ बैसाय् बस दुर्घटना जूगु दु । ना३ख ९७५९ ल्याःया बस वंगु चान्हय् दुर्घटना जूबलय् ३७म्ह घाःपाः जूगु व छम्ह तच्वगु जिल्ला प्रहरी ज्याकु बाँकें जानकारी बिउगु दु । 
 
दुर्घटनाग्रस्त बस राप्ती सोनारीं दाङया देउखुसी भमचा यंकेत वंगु प्रहरीं न्ह्यथंगु दु । दुर्घटनाय् घाःपाः जूपिं सकसिया राप्ती सोनारी व कोहोलपुर मेडिकल कलेजय् वासः जुयाच्वंगु दु ।
Categorized in अपराध