प्रतिधिसभाया मुँज्याय् निगु आयोगया वार्षिक प्रतिवेदन पेस यायेगु
चौलाथ्व षष्ठी ११४१, चैत्र ६ शुक्रवाः
प्रतिनिधिसभाया मुँज्या थौं च्वनीगु जूगु दु । थौंया मुँज्याय् प्रधानमन्त्री केपी शर्मा ओलीं निगु आयोगया वार्षिक प्रतिवेदन पेस यायेगु ज्याधलः दु ।
प्रधानमन्त्री ओलीं लोकसेवा आयोगया ६१क्वःगु वार्षिक प्रतिवेदन २०७७ व राष्ट्रिय मानव अधिकार आयोगया आर्थिक दँ २०७६÷७७ या वार्षिक प्रतिवेदन पेस यायेगु ज्याधलः दुगु संसद् सचिवालयं धागु दु ।
अथेहे थौंया मुँज्याय् पूर्व राष्ट्रियसभाया दुजः व संविधानसभाया दुजः अशोक कोइराला मदुगुलिइ शोक प्रस्ताव पारित यायेगु ज्याधलः न दु । कोइराला ७१दँया वैंशय् वंगु बुधवाः मदुगु खः । सर्वोच्च अदालतया फैसलानाप प्रतिनिधिसभा पुनःस्थापनालिपा आःतक स्वक्वः तक मुँज्या च्वंसां स्वंगुलिं मुँज्या उपलब्धिविहीन जूगु दु ।
राजनीतिक दलदथुइ लिपांगु ई अप्वःगु कचवंया हुनिं संसद्या मुँज्या प्रभावित जुयाच्वंगु दु । संसद्या हिउँदे अधिवेशन न्ह्याःगु निवाः दयेधुंकूगु अवस्थाय् न मुँज्याय् महत्वपूर्ण विषयलय् सहलह मजूनि । सामान्यता अधिवेशन न्ह्याःगु न्हापांगु दिं शीर्ष नेतातय्सं सम्बोधन यायेगु प्रचनल दु ।
तर चालू अधिवेशनय् धाःसा तत्कालीन नेकपा एमाले व माओवादी केन्द्र ब्वथःगु, प्रतिनिधिसभां संसद् विघटनायात बदर याःगु अले एमालेया आन्तरिक कचवंया हुनिं परम्परा त्वाथःगु खः ।
संसद् विघटन उल्टे जुइवं फागुन २३ गतेच्वंगु न्हापांगु मुँज्याय् सत्ता पक्षया असन्तुष्टि व प्रतिपक्षीया विरोधया हुनिं मुँज्या प्रभावित जूगु खः । अनलिं च्वंगु मुँज्या शोक प्रस्ताव पारित यानाः लिछ्यानावःगु दु ।
Categorized in राजनीति
