संक्रमित सांसदपिन्सं नं संसदया मुँज्याय् ब्वति काइगु
लहनान्यूज | चौलागा द्धादशी ११४१,बैसाख २५ सनिवाः
संसद् अधिवेशन न्ह्या वःगु ईलय् निम्ह मन्त्रीलिसें निगू दर्जन सांसदपिं कोरोना संक्रमण जूगु पुष्टि जूगु दु ।
संस्कृति पर्यटन तथा नागरिक उड्डयनमन्त्री भानुभक्त ढकाल व महिला बालबालिका तथा ज्येष्ठ नागरिकमन्त्री जुली महतो संक्रमितया धलःखय् दु । अथेहे निगू दर्जन सांसदपिं संक्रमित जुसेंलि आइसोलेसनय् च्वनाच्वंगु दु । प्रधानमन्त्री केपी शर्मा ओलीें विश्वासया मत कायेत सोमबाः च्वनिगु प्रतिनिधिसभाया मुँज्याय् मन्त्रीलिसें उपिं सांसदपिन्त मतदानय् ब्वति कायेत तयारी जुयाच्वंग्ु संसद सचिवालयं न्ह्यथंगु दु ।
संक्रमणया हुनिं स्वनिगःलिसें देय्या थीथी जिल्लाय् निषेधाज्ञा न्ह्यनाच्वंगु ईलय् सोमबार न्ह्याइगु विशेष अधिवेशनय् प्रधानमन्त्री ओलीं विश्वासया मत कायेगु थ्वसिबेंन्ह्यः हे घोषणा यानादिगु खः ।
अथेहे कन्हे च्वनिगु कार्य व्यवस्था परामर्श समितिया मुँज्यां संक्रमित जूपिं सांसदपिन्त मतदानया व्यवस्थाया प्रक्रियाबारे निर्णय जुइगु संसद सचिवालयं न्ह्यथंगु दु । विश्वासया मत कायेगु प्रस्ताव ताःलाकेगु व मलाकेत दक्वः सांसदपिनिगु उपस्थिति अनिवार्य याःगु दु ।
गुकिं याना संक्रमित सांसदपिन्त नं मतदानय् ब्वति कायेकेत सहलह जुयाच्वंगु खः । बुधबाः व विहीबाः संसद् भवन न्हू बानेश्वरय् २०५म्ह सांसदपिनिगु परीक्षण यागुलिइ १२८म्हेसियागु रिपोर्ट वःगुलिइ १४म्हेसित संक्रमण पुष्टि जूगु संसद सचिवालयं न्ह्यथंगु दु ।
सचिवालयया कथं दकले आपाः नेकपा एमालेया १४म्ह, जनता समाजवादी पार्टीया प्यम्ह, कांग्रेस व माओवादी केन्द्रया निम्ह÷निम्ह सांसदपिन्त संक्रमण जूगु दु ।
