अविश्वाया प्रस्तावपाखें सरकार क्वथलेत विपक्षीपिन्त सत्तारुढ दलया सांसदया हाथ्या, संसदयात ज्याविहीन याःगु कांग्रेसया द्वपं
राम डंगोल | चिल्लाथ्व दशमी ११४१, चैत्र १० मंगलबाः
सत्तारुढ दलया सांसदपिन्सं अविश्वासया प्रस्तावपाखें सरकार क्वथलेत विपक्षी दलतय्त हाथ्या बिउगु दु । प्रतिनिधि सभाया थौंया मुँज्याय् नवासें नेकपा एमालेया सांसद खगराज अधिकारीं प्रधानमन्त्री केपी शर्मा ओलीं राजीनामा बिइमखु धासें अविश्वास प्रस्तावपाखे चिइकेत हाथ्या बियादिल । वय्कलं अविश्वास प्रस्ताव हयेमफुपिन्सं छाय् प्रधानमन्त्रीयात नैतिकता स्यनेगु धया न्ह्यसः तयादिल ।
उखे प्रमुख प्रतिपक्षी नेपाली कांग्रेसया सांसद गगन थापां वर्तमान सरकार दत्तले संसदया अपमान अप्वःया वनिगु धयादिल । प्रधानमन्त्री ओलीं संसदलिसे बदला कयाच्वंगु धासें वयकलं जनतापिन्सं अपमानया बदला पाय्छि इलय् काइगु चेतावनी बियादिल । प्रतिनिधिसभा भंग यायेगु निर्णय पाय्छी खः धैगु खँ सत्य यायेत संरकारं संसदयात ज्या मदयेक सुम्क तयेत स्वःगु टिप्पणी थापां यानादिल ।
थ्वयाँन्ह्यः मुँज्याय् सभामुखलिसे ई कया कांग्रेसका सांसद दिलेन्द्रप्रसाद बडुं सीमा क्षेत्रय् भारतं छगूतर्फी तटबन्ध दयेकाच्वंगुलिइ सरकार सुम्क च्वना मौन समर्थन यानाच्वनागु खःला धका न्ह्यसः तयादिल । वय्कलं दार्चुलाया सदरमुकामया महाकाली नगरपालिका वडा नम्बर ५ या भारतपाखे भारत सरकारं वंगु स्वलाः न्ह्यःनिसें नेपाःयात जानकारी व सहमति मदयेक छगूतर्फी कथं तटबन्ध निर्माण यानाच्वंगु धासें तत्काल कुटनीतिक पहलपाखें ज्या दिकेत सरकारया ध्यानाकर्षण यानादिल । सांसद बडुं सरकारं थःयात राष्ट्रवादी नालाकासां व्यवहारय् अथे खनेमदुगु टिप्पणी यानादिल ।
नेपाली कांग्रेसया हे मेम्ह सांसद जिपछिरिङ लामां भारतं मिचेयाःगु सिमाना कःघाना नक्सा जारी याःसां जमिन धाःसा लित कायेफुगु मदुनि धासें न्ह्यसः यानादिल । एमालेया सांसद गजेन्द्रबहादुर महतं नेपाल विकसित राष्ट्रय् स्तरोन्नती जूगु धाःगु सरकारका मन्त्रीपिनिगु धापूप्रति आपत्ति यानादिल । कांग्रेसया हे मेम्ह सांसद उमा रेग्मी निर्मला पन्तया हत्यारा गबलये पत्ता लगेयायेगु धयादिल ।
सांसद झपट रावलं संसद पुर्नस्थापनालिपा दल विभाजन यायेगु ज्या जुयाच्वंगु टिप्पणी यानादिल । सांसदपिं अञ्जना विसंखे, आशाकुमारी विक, तुलसी थापा, कृष्णप्रसाद दाहाल, कृष्णप्रसाद दाहाल, गजेन्द्रबहादुर महत, केदार सिग्देल लगायतपिन्सं समसामयिक विषयस सरकारया ध्यानाकर्षण यानादिगु खः ।
थौंया प्रतिनिधि सभाया मुँज्या लिपा आः चैत्र १८ गतेतक्कया नितिं स्थगित याःगु दु ।
