“हाकनं संसद विघटन जुइफु” : प्रधानमन्त्री ओली
राम डंगोल | चौलाथ्व तृतीया ११४१, चैत्र ३ मंगलवाः
प्रधानमन्त्री केपी शर्मा ओलीं सरकार व संसद् न्ह्याकेगु अवस्था मजुल धाःसा हाकनं संसद् विघटन जुइगु ख्याच्वः बियादीगु दु ।
राष्ट्रपति विद्यादेवी भण्डारीं थौं शीतलनिवासय् सतूगु सर्वदलीय मुँज्याय् प्रधानमन्त्री ओलीं वंगु पुस ५ गते याःगु प्रतिनिधिसभाया विघटन पाय्छि जूगु धासें आः नं सरकार व संसद बाँलाक्क न्ह्याकेगु अवस्था मजुल धाःसा विघटन याना चुनावय् वनेगु विकल्प मदूगु धयादिल । मुँज्याय् ब्वःति दुपिं नेतापिनिकथं सरकार व संसद् न्ह्याकेगु अवस्था मजुईवं थम्हं प्रतिनिधिसभा विघटनया नितिं सिफारिस यानागु प्रधानमन्त्री धयादिगु उमिगु धापू खः ।
संविधानया धारा ७६ व ८५ नं विघटनया व्यवस्था यानातःगु दु धाःसें ओलीं सरकार व संसद् न्ह्याःमवन धाःसा हाकनं विघटन जुई धयादिल । प्रधानमन्त्री ओलीं निर्वाचन घोषणायात प्रतिगमन धागुलिइ नं असन्तुष्टि प्वंकादिल । उगु झ्वलय् राष्ट्रपति भण्डारीं थम्हं संविधानया अक्षरशः पालना यानागु धासें सरकारं याःगु सिफारिस कार्यान्वयन जक यानागु व थःगु निर्णयपाखें छुं नं ज्या मयानागु धयादिल ।
मुँज्यालिपा राष्ट्रिय जनमोर्चाया नायः चित्रबहादुर केसीं समसामयिक विषयस सहलह जूगु धयादिल । मुँज्याय् नेपाली कांग्रेस, जनता समाजवादी पार्टी, राष्ट्रिय प्रजातन्त्र पार्टी, माओवादी केन्द्र, नेपाल मजदुर किसान पार्टी, राष्ट्रिय जनमोर्चालिसें दलका नेतापिनिगु ब्वति दूगु खः ।
माधवकुमार नेपाल, झलनाथ खनाल व डा बाबुराम भट्टराइ धाःसा मुँज्या ब्वति कयामदि ।
