पूलाँपिं प्यम्ह प्रधानन्यायाधीश व पूर्वसभामुख विरुद्ध सर्वाेच्चय् अपहेलना मुद्दा दायर
लहनान्यूज | पोहेलाथ्व चतुर्दशी ११४१, माघ १४ बुधवाः
संसद विघटनया विरोधय् संयुक्त विज्ञप्ति जारी यापिं प्यम्ह पूर्व प्रधानन्यायाधीशविरुद्ध सर्वाेच्च अदालतय अपहेलना मुद्दा दाय याःगु दु ।
अधिवक्त धनजीत बस्नेतं पूर्वप्रधानन्यायाधीशपिं मीनबहादुर रायमाझी, अनुपराज शर्मा, कल्याण श्रेष्ठ व सुशीला कार्कीविरुद्ध अपहेलना मुद्दा दायर याःगु खः । मुद्दाया पेशी थ्वहे माघ १५ गते कन्ह्ये जुई ।
अदालतय विचाराधीन मुद्दाय् टिप्पणी याना स्वतन्त्र व निष्पक्ष न्याय सम्पादनय् हस्तक्षेप याःगु धासें रिट निवेदकं उमिविरुद्ध न्याय प्रशासन ऐन २०७३ या दफा १७ या उपदफा ४ कथं हदैतक्क सजायँ माग याःगु दु ।
अदालतया अवहेलना याःगु ठहर सम्बन्धी अदालतं कसूरदारयात १ दँतक्क वा १०द्वः ध्येबातक्क जरिवाना वा निगूलिं सजाय वा मेगु उपयुक्त उर्ज जुई फइगु कानूनी व्यवस्थ दु ।
पूर्वधानन्यायधीशपिं रायमाझी, शर्मा, श्रेष्ठ व कार्कीं पुस २४ गते संयुक्त विज्ञप्ति पितब्वया प्रतिनिधिसभा विघटनयात असंवैधानकी धाःगु खः ।
थ्वहेदथुई पूर्वसभामुख दमननाथ ढुंगानाविरुद्ध नं सर्वोच्च अदालतय् न्यायालयया अवहेलनासम्बन्धी मुद्दा दायर जूगु दु ।
वंगु पुस २७ गते येँय् ग्वसाः ग्वःगु ज्याझ्वलय् वय्कलं नवाःगु खँयात कयाः अधिवक्ता राजाराम घिमिरें अवहेलना मुद्दा दायर यानादीगु खः ।
पूर्व सभामुख ढुङ्गानां ‘न्यायाधीशपिन्सं संविधान हाचां गायाः फैसला यायेफइमखूगु व उमिगु नं पदीय सुरक्षाया खँ दु धासें सडकं न्यायाधीश सालेगु दिं वयेफुगु धइगु अभिव्यक्ति बियादीगु खः ।
वय्कलं प्रतिनिधिसभा विघटनया बहस याइबलय् संवैधानिक व राजनीतिक निगुलिं पक्षं स्वयेमाःगु धासें संविधान कथं फैसला यायेमाःगु खःसा सर्वोच्च अदालतं शत प्रतिशत संसद थनेमाःगु धयादीगु खः ।
रिट निवेदनय् छगू जिम्मेवार तगिमय् च्वनाः ज्या यानाच्वंम्ह मनुखं अदालतय् विचाराधिन विषयस दबाव ब्वलंकेगु कथं ब्यूगु अभिव्यक्ति अशोभनिय जूगु धासें हदतक्कया सजाय माग याःगु दु ।
