सरकार व विप्लव पुचः दथुया न्हापांगु औपचारिक वार्ता सकारात्मक
सिल्लागाः चौथी ११४१, फागुन १९ बुधवाः
सरकार व विप्लव पुचः दथुई न्हापांगु झ्वःया औपचारिक वार्ता क्वचाःगु दु ।
प्रधानमन्त्रीया सरकारी निवास वालुवाटारय् जूगु वार्ताय् सरकार पाखें गृहमन्त्री रामबहादुर थापा ‘बादल’, प्रधानमन्त्रीया परराष्ट्र मामिला सल्लाहकार राजन भट्टराई व विप्लव पुचलं खड्गबहादुर विश्वकर्मा ‘प्रकाण्ड’ व उदय चलाउनेया ब्वःति दूगु खः ।
न्हापांगु झ्वःया सहलह बाँलागु धाःगु दु । सहलहय् विप्लव पुचलं थःपिन्त तयातःगु प्रतिबन्ध लितकायेमाःगु सर्त न्ह्यःने तःगु दु ।
ज्वनात पिं नेता÷कार्यकर्तापिन्त त्वःता बिइगु व उपिन्त तयातःगु मुद्दा लितकायेमाःगु माग याःगु दु । सहलहयात न्ह्याकातुं च्वनेगु निगू पक्षं सहमत जुगु धाःगु दु ।
मंगलबाः सरकारं वार्ताया लागि गृहमन्त्री बादलया नेतृत्वय् सरकारी वार्ता टोली व प्रकाण्डया नेतृत्वय् विप्लव पुचलं वार्ता समिति गठन याःगु खः ।
