सरकार व विप्लव नेतृत्वया नेकपा दथुइ स्वंगू बुँदे सहमति
लहनान्युज | सिल्लागाः षष्ठी ११४१, फागुन २० बिहीवाः
नेपाल सरकार व नेत्रबिक्रम चन्द विप्लव नेतृत्वया नेकपा दथुइ स्वंगू बुँदे सहमति जूगु दु ।
म्हिगः तक्वःतक्क जूगु वार्ता लिपा निगुलिं पक्ष दथुई स्वंगु बुँदे सहमति जूगु खः ।
सहमतिपत्रय् सरकारी वार्ता टोलीया संयोजक गृहमन्त्री रामबहादुर थापा व नेपाल कम्युनिष्ट पार्टी पाखें वार्ता टोली संयोजक खड्गबहादुर विश्वकर्मां ल्हाःचीं तयादीगु खः ।
सहमतिकथं नेपाल कम्युनिष्ट पार्टीं संवादपाखें हे दक्वः राजनीतिक विषय त क्वःचायेकेगु व थःगु दक्वः गतिविधि त शान्तिपूर्ण रुपं न्ह्याकेगु सहमति जूगु दु ।
अथेहे सरकार पाखें तयातःगु प्रतिबन्ध चीकाः जेलय् दुपिं नेता कार्यकर्ता रिहा यायेगु व मुद्दा नं लितकायेगु सहमति जूगु दु ।
शुक्रबाः २ ताः ईलय् छगू ज्याझ्वः याना प्रधानमन्त्री केपी शर्मा ओली व विप्लव समूहया महासचिव विप्लवलं सहमतिया विस्तृत विवरणलिसें सम्बोधन याइगु ज्याझ्वः दूगु प्रेस नोटय् न्ह्यथनातःगु खः ।
