वाङ्गमय शताब्दी पुरुष डा. सत्यमोहन जोशीया वृत्तचित्र निर्माण पुचः व यल महानगरपालिकाया ग्वसालय् निर्माण जुगु शताब्दी पुरुष सत्यमोहन जोशीया जीवनीया डकुमेण्ट्री “म्वानाच्वंगु इतिहास वाङ्गमय शताब्दी पुरुष सत्यमोहन जोशी” वाङ्गमय शताब्दी पुरुष सत्यमोहन जोशीं छगू ज्याझ्वःया दथुइ पितब्वज्या यानादीगु दु।

उकिया नापं वाङ्गमय शताब्दी पुरुष जोशी श्रव्यदृश्य आर्काइभ निर्माणया न्हापांगु क्यनेज्या न जुगु खः । यल कुपन्डोलया सातोआकी स्मृति भवनय् जूगु ज्याझ्वलय् सत्यमोहन जोशी वृत्तचित्र निर्माण पुचःया अधक्ष्य डा.पुष्पराज राजकर्णिकारया सभाधक्ष्यताय् जुगु खः । ज्याझ्वलय् विशेष पाहाँ कथं वाङ्गमय शताब्दी पुरुष जोशीया नं उपस्थिति दुगु खःसा मूपाहाँ कथं यल महानगरपालिकाया मेयर चिरीबाबु महर्जन झायादीगु खः ।

ज्याझ्वलय् डकुमेण्ट्री दयेकेत आर्थिक ग्वाहालि यापिं मोतिलाल शिल्पकार, डा.सुमित्रा मानन्धर, यज्ञरत्न धाख्वाः, कैलाशभक्त प्रधानाङ्ग, लक्ष्मीदास मानन्धर, नेवाः देय दबू, नेपालभाषा एकेडेमीयात ग्वसाः खलःपाखें सुभाय् कथं सम्मान यागु खः ।

डकुमेण्ट्री निर्माण पुचःया दुजः शाक्य सुरेनं लसकुस यानादीगु उगु ज्याझ्वलय् विशेष पाहाँ जोशी, मूपाहाँ महर्जन डा.राजकर्णिकारपिन्सं डकुमेण्ट्रीयात कयाः थःथःगु नुगःखँ तयादीगु खःसा निर्माण पुचःया दुजः सुनिता राजभण्डारीं सुभाय् देछानादीगु खः ।

Categorized in राष्ट्रिय