“सत्य” त्वपुइगु कुतलय् सत्यया सः तइपिं...
सुरजवीर वज्राचार्य | पोहेलाथ्व दशमी ११४६, पुस १५ मंगलवाः
पत्रकारितां सत्यतथ्य ब्वँमि, न्यँमि, स्वकुमि तक थ्यंकी । पत्रकारपिंसं भ्रम ह्वलेमज्यू, सत्य कनेमाः, सत्य स्थापित यायेत भूमिका म्हितेमाः। तर संचार ख्यलं हे यानाच्वंगु विभेद झी नेवाःत लगायत आदिवासी जनजातितय्गु आपालं मुद्दाय् लुयाच्वंगु दु, उकिया विरुद्धय् सः थ्वयाच्वंगु दु । थुकथं हे थ्वयाच्वंगु सः व छगू आन्दोलन खः सत्यनारायण बहादुर श्रेष्ठया योगदानया कदर व मानया निंतिं थ्वयाच्वंगु सः व जुयाच्वंगु आन्दोलन।
पत्रकारिताया धर्म व उगु भाला बोध यानाः न्ह्यज्यायेमाःगु राष्ट्रया प्यंगूगु अङ्गं यानाच्वंगु थीथी विभेदया हुनिं धइगु निष्पक्ष जुइमाःपिं पत्रकारत राजनीतिक दलया विचारं थःत भुंकाः इमिगु ल्यूल्यू जुइगु व दलया स्वार्थयात मिखा तिसिनाः समर्थन यासें पत्रकारिताया सिद्धान्त व धर्म ल्वःमंकीगु प्रवृत्तिया हुनिं खः । थजाःगु हे अवस्थां अन्याय न्यायय् हिलेमफुनि।
नेपाःया पत्रकारत छवाः यायेगु तातुनां न्हापांगु खुसी वि.सं. २००८ सालय् नेपाल टुडेया सम्पादक सत्यनारायण बहादुर श्रेष्ठं नेपाल पत्रकार संघ नीस्वनादिल । २००७ सालया क्रान्ति लिपा पत्रकारत छवाः यायेगु, पत्रकारिता ख्यःया विकास व पत्रकारपिनिगु हक अधिकारया निंतिं सकसित छगू संघय् मुंकेगु कुतः गुलि तःजिगु कुतः जुइ धइगु थौंया नेपाल पत्रकार महासंघं नं चक्कंक क्यनाच्वंगु दु । व हे जगय् थौं नेपाल पत्रकार महासंघ दनाच्वंगु दु, व हे विभेदं जाःगु नीति कय्च्यानाः पत्रकारपिं छवाः यानाच्वनागु दम्भ ब्वयाच्वंगु दु । म्हिगः सत्यनारायण बहादुर श्रेष्ठ संस्थापक नायः जुयाः नीस्वंगु नेपाल पत्रकार संघया सेक्रेटरीया भाला भोजबहादुर सिँह न्यौपानें पूवंकादीगु ग्रीष्मबहादुर देवकोटां ‘नेपालको छापाखाना र पत्र–पत्रिकाको इतिहास’ सफुतिइ कियातःगु दु । पत्रकारिता ब्वमिपिनिगु निंतिं थ्व न्हूगु तथ्य मखु। २००९ साल वैशाख २८ गते आर्य समाज मन्दिर, भोताहितिइ जूगु संघया निक्वःगु सभां हाकनं नेपाल टुडेया सम्पादक सत्यनारायण बहादुर श्रेष्ठयात हे नायः ल्यल।
कार्यसमितिइ उपसभापति प्रेमराज शर्मा (सं, गोरखापत्र), सेक्रेटरी भोजबहादुर सिँह न्यौपाने, (सं, तरंग), ज्वाइन्ट सेक्रेटरी रामहरि जोशी, (सं, नेपाल पुकार), कोषाध्यक्ष रामराज शर्मा, (नेपाल पुकार) व सदस्य नारायणप्रसाद उपाध्याय, देवेन्द्रराज शर्मा, भीमभक्त जोशी, प्रकाशचन्द्र टण्डनपिंत ल्यल। थुगु समितिं उबलय् देशय् दुनेच्वंपिं व पिनेच्वंपिं पत्रकारपिं दथुइ स्वापू धिसि धायेकेगुनिसें श्रमजीवी पत्रकार व समाचारपत्रया अधिकार रक्षा यायेगु तातुनां न्ह्यज्याःगु खनेदु । संचार ख्यलय् दुगु अस्पष्टता न्हंकेतः ज्या न्ह्याकूगु खनेदु । मेखे उबलय्या सरकारं दयेकूगु कानूनं संचार ख्यलय् हस्तक्षेप जुइगु खँ न्ह्यथंसें थुकिया विरुद्ध थःगु सः नं थ्वयेकूगु खः।
ग्रीष्मबहादुर देवकोटां थःगु सफू “नेपालको छापाखाना र पत्रपत्रिकाको इतिहास”य् नेपालय् पत्रकारत संगठित यायेगु ज्या जूगु खँ न्ह्यथनादी कथं “नेपाल पत्रकार संघया पलिस्था २००८ सालय् जूगु खः । थुकिया संस्थापक अध्यक्ष सत्यनारायण बहादुर श्रेष्ठ खः ।” धकाः च्वयादीगु दुसा गोरखापत्रय् २००९ सालमा पिदंगु समाचारं नं व हे धाः ।
“२००८ सालय् पत्रकार एकताया तातुनां सत्यनारायण बहादुर श्रेष्ठं थःगु नेतृत्वय् नेपाल पत्रकार संघ नीस्वनादीगु खः ।” थुगु तथ्यं सत्यनारायण बहादुर श्रेष्ठ हे नेपाल पत्रकार महासंघया संस्थापक खः धकाः प्रमाणित याइ । तर न्ह्यः वःपिंत थने फइ, न्ह्यः वः पहः यानाच्वंपिंत थनेफइमखु धाःथेंजाःगु परिस्थिति नेपाल पत्रकार महासंघय् दु, अले उगु महासंघय् राजनीतिक दलया बल ज्वनाः दुहां वनीगु कार्यसमितियाके नं सत्यया निंतिं ल्वायेत तागत मगाः । थुगु सः थनाः सत्यया पक्षय् आन्दोलन यानाच्वंगु नेवाः पत्रकार राष्ट्रिय दबू, नेपाल आदिवासी जनजाति पत्रकार महासंघया भोट कायेत सत्यनारायाणया योगदान कदर यायेगु÷याकेगु व जुयाच्वंगु अन्यायया विरुद्ध सः तयेधकाः त्याका वंपिनिगु नं ख्वाः हिलावंगु नं दु । उकथं बेइमानी याःपिं राजनीतिज्ञ पत्रकारतय् दथुइ नेवाः व आदिवासी जनजाति पत्रकारपिं नं लाःसा थुगु हे तथ्यं पत्रकार महासंघ दुने निगू धारय् पत्रकारत खनेदुगु अवस्था नं मेखे दु ।
झीगु सः त्वपुइगु कुतः यानाच्वंपिंसं धयाच्वंगु दु “नेपाली काँग्रेसया संस्थापक नेता व पूर्वप्रधानमन्त्री कृष्णप्रसाद भट्टराईं २०१२ सालय् संस्थापक अध्यक्ष कथं नेपाल पत्रकार महासंघया जग स्वंगु खः । नेपाल पत्रकार संघया पुनर्गठनया थ्व घटनायात हे नेपाल पत्रकार महासंघया नीस्वना खः धकाः ८ सालया इतिहास हुइगु कुतः इमिसं यानाच्वंगु दु । थ्व हे तथ्ययात विधानय् तकं दुथ्याकाः छगू बल्लाःगु आधार धकाः ब्वयाच्वंगु नेपाल पत्रकार महासंघं थःगु पलिस्था दिं हे २०१२ चैत्र १६ गते धकाः हनाः वयाच्वंगु दुसा नायःपिनिगु किपाया धलखय् नं कृष्णप्रसाद भट्टराई हे न्हापांम्ह नायः कथं ब्वयाः सत्यनारायण बहादुर श्रेष्ठयात अपमान यानाच्वंगु दु ।
थजाःगु प्रवृत्तिया विरोध यासें सत्यतथ्ययात मनन यायेगु सः थ्वयेकाः न्ह्यज्याना च्वनापिं झीसं थुगु सलय् तिबः जुइक सत्यनारायण बहादुर श्रेष्ठया जन्मजयन्ती हनेगु परम्परा न्ह्याका ।
नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबुलिं ने.सं. ११४० (२०७६) सालय् दकलय् न्हापांखुसी सत्यनारायण बहादुर श्रेष्ठया १०४ क्वःगु जन्मजयन्ती हनां थुगु परम्परा न्ह्याकूगु खः । २०७७ सालय् १०५ क्वःगु जन्मजयन्तीइ उबलय्या सञ्चार तथा सूचना प्रविधि मन्त्री पार्वत गुरुङया मूपाहांकथं ब्वति दुगु खः । १०६ क्वःगु जन्मजयन्ती नेपाल पत्रकार महासंघया सभाहलय् हनेगु ज्या जूगु खःसा थुगु ज्याझ्वलय् नेपाल पत्रकार महासंघं माःगु सकतां ग्वाहालि यानाः नं सुं हे उपस्थिति मजूसे थुगु तथ्य स्वीकार यायेगु हिम्मत मदुगु खँ मौन रुपं तःगु जुल । वय्कःया १०७ क्वःगु जन्मजयन्ती यलया ज्वागल बैंक्वटय् जूगु खःसा १०८ क्वःगु जन्मजयन्ती हनेगु झ्वलय् रक्तदान व पत्रकार–कलाकार दथुइ फुटसल कासा नं जूगु जुल । थुगु आन्दोलनया अझ ब्यापक जुइक जूगु ज्या फुटसल कासा थौंतक नं निरन्तर जुयाच्वंगु जुल । थुकथं आन्दोलनया स्वरुपय् विविधता हयाः सः तयेगु ज्या मद्दिक्क जुयाच्वंगु हे जुलसा थुगु ज्याया अःखः कृष्णप्रसाद भट्टराईया नामं आमसंचार प्रशिक्षण प्रतिष्ठान गठन यायेगु कुतः थीथी सरकारं बारम्बार यानावं च्वन । सुशील कोइराला प्रधानमन्त्री जुयाच्वंबलय् उबलय्या सञ्चार मन्त्री मिनेन्द्र रिजालया प्रस्तावय् मन्त्रिपरिषदं ‘कृष्णप्रसाद भट्टराई राष्ट्रिय आम सञ्चार प्रतिष्ठान’ नीस्वनेगु निर्णय याःगु खँ तल । थुगु निर्णयया विरुद्धय् सः थ्वयेवं थुगु ज्यां सरकार लिचिल । ‘कृष्णप्रसाद भट्टराई राष्ट्रिय आम सञ्चार प्रतिष्ठान’ या नां हिलाः ‘राष्ट्रिय आम सञ्चार प्रतिष्ठान’ तःगु खः । सञ्चारकर्मीतय्गु क्षमता विकासया निंतिं प्रतिष्ठान नीस्वनेगु भिंगु ज्या खःसां थुकिं कृष्णप्रसाद भट्टराईयात नेपाल पत्रकार महासंघया संस्थापक नायःया नांं बीगु थेंजाःगु गलत तथ्यय् आधारित ज्याया विरोध सकभनं जूगु जुल ।
२०७२ सालया बजेटय् अर्थमन्त्री रामशरण महतं नेपाली काँग्रेसया संस्थापक नेता कृष्णप्रसाद भट्टराईया लुमन्ति आमसंचार प्रतिष्ठान नीस्वनेगु खँ न्ह्यथन । ०७४ सालय् मोहनबहादुर बस्नेत सञ्चारमन्त्री जूबलय् नं थुगु खँ न्ह्यथन । २०७९ सालय् नं सरकारं थःगु नीति व कार्यक्रमय् कृष्णप्रसाद भट्टराई आमसञ्चार प्रशिक्षण प्रतिष्ठान नीस्वनेगु खँ न्ह्यथन । थथे सरकारं गुबले गुबले थुगु गलत तथ्य स्वनेतः कुतः यात, थुकिया सकभनं विरोध जुल । नेपाल पत्रकार महासंघया निवर्तमान नायः विपुल पोखरेल व ज्यासना पुचःनाप नेवाः पत्रकार नं सहभागी जुयाः नेपाल आदिवासी जनजाति महासंघ फोनिजं बारम्बार खँ ब्याकाः थुगु विषय अध्ययनया ज्या न्ह्याकेगु सः तःगु खः । पत्रकार दबुलिं तथ्यं छर्लङ्गगु थुगु खँया हानं अध्ययन यायेगु धायेगु धइगु हे मेगु षडयन्त्र खः, थुकियात गथे खः अथे हे स्वीकार यायेमाः धकाः सः तःगु खःसा पत्रकार महासंघया २७ क्वःगु महाधिवेशनया माइन्डेटयात मान तयाः थुगु कुतःयात स्वीकार यायेगु ज्या जूगु खः ।
महासंघया २७ क्वःगु महाधिवेशनं त्रिभुवन विश्वविद्यालयया आमसञ्चार तथा पत्रकारिता विभाग र इतिहास विभाग दुथ्याकाः अध्ययन कार्यदल दयेकाः थुगु खँया सत्यतथ्य क्वःछीत म्यान्डेट ब्यूगु खः । थुगु खँय् फोनिजया नेतृत्वय् नेवाः पत्रकार, मधेशी पत्रकारपिंसं बः बियाः वयाच्वंगु जुल । थुगु ज्याय् लिबाके मज्यूगु खँय् बारम्बार ध्यानाकर्षण याकूगु खः । थुगु सःया सम्बोधन आःतक नं मजूनि । अझ उगु म्यान्डेट अःखः महासंघया पूर्व अध्यक्षपिनिगु ब्यक्तित्वया मुना “अग्र अनुहार” सफू पिथना महासंघं थुगु सःया अःखः हानं कृष्णप्रसाद भट्टराई हे संस्थापक नायः खः धइगु भ्रमयात संस्थापक यायेगु मेगु कुतः यात । गुकिया नेपाल आदिवासी जनजाति पत्रकार महासंघ (फोनिज), मधेसी पत्रकार समाज, नेवाः पत्रकार राष्ट्रिय दबू लगायत संगठनं सफूया पितब्वज्याय् हे वनाः विरोध यासें दबुलिइ हे उगु सफू खुनाः तकं विरोध याःगु जुल ।
नेपाल पत्रकार महासंघं इमान्दार जुयाः महाधिवेशनया म्यान्डेटयात ध्यान तयाः कत्ताक्क ज्या मन्ह्याकूगु हुनिं थुगु खँ गन खः अन हे दिनाच्वं थें ताः । तर थुकी “ज्यूज्यू धायेगु–ज्या मयायेगु” पहःया षडयन्त्र जुयाच्वंगु झीसं वाः चायेकेमाः । आन्दोलन याइपिनिगु पलाः अझ धिसि धायेमाः, सः अझ सशक्त जुइक ब्वलंकेमाः, ह्यूपा छन्हु अवश्य वइ । सत्यनारायण बहादुर श्रेष्ठया योगदानया कदर छन्हु अवश्य जुइ।
