शहीद स्मारक ‘बी’ डिभिजन लिग फुटबलया उपाधिया लागिं सातदोबाटो व खुमलटारलिसे टक्कर
सिल्लागाः चौथी ११४१, फागुन १९ बुधवाः
शहीद स्मारक ‘बी’ डिभिजन लिग फुटबलय् बाँसबारी युवा क्लब स्वंगूगु थासय् लाःगु दु ।
म्हिगः जूगु कासाय् पुल्चोक स्पोर्ट्स क्लबायत २÷० गोलं बुकाः बाँसबारी स्वंगूगु थासय् थ्यंगु खः ।
एन्फा कम्प्लेक्सया मैदान सातदोबाटोय् जूगु कासाय् बाँसबारीयात त्याकेत निगुलिं गोल निशान सुनारं यात ।
कासा त्याःगुलिसें बाँसबारीं ८ कासापाखें १८ ल्याः मुंकूगु दु । शीर्ष थाय्या सातदोबाटो युथ क्लबया २२ अले निगूगु थाय्या खुमलटार युथ क्लबया १९ ल्याः दु ।
बाँसबारीलिसे बूगु पुल्चोक २ ल्याःलिसें दक्कले ल्यूने दुगुलिं घटुवा जुइगु सम्भावना अप्वःगु दु ।
म्हिगःया न्हापांगु कासाय् मध्यपुर युथ एसोसियसनं निगूगु जित ल्हातय् लाकेगु झ्वलय् श्री कुमारी क्लबयात २–१ गोलं बुकल ।
मध्यपुरया लागिं कैलाश लामिछाने खत्री व धिरज श्रेष्ठं १÷१ गोल यात ।
श्री कुमारीया आशिष राईं १ गोल लितबिल । कासा त्याःगुलिसें मध्यपुर ८ कासापाखें ७ ल्याःलिसें ९गूगु अले बूगु श्री कुमारी ८ कासाय् ७ ल्याःलिसें च्यागूगु थासय् दु ।
