ब्वनेकू लच्छि बन्द यायेत स्वास्थ्य मन्त्रालयया सिफारिस
लहनान्युज | चौलाथ्व द्धितीया ११४१,बैसाख १ बुधवाः
स्वास्थ्य तथा जनसंख्या मन्त्रालयं कोरोना भाइरसया अप्वयाच्वंगु संक्रमणया ग्याःचिकुया हुनिं स्वनिगःलिसें तःधंगु शहरया ब्वनेकू म्ह्वतिं लच्छि बन्द यायेत सिफारिस याःगु दु ।
बन्द इलय् अनलाइन कक्षापाखें ब्वंकेत मन्त्रालयं इनाप याःगु दु । मन्त्रालयं ब्वनेकूलिसें पार्टी प्यालेस, देगः, सिनेमा हल, रात्रीकालीन व्यवसाय नं बन्द यायेत सिफारिस याःगु दु ।
आः खनेदुगु न्हूगु भेरियन्तया कोरोना भाइरस ल्याय्म्ह व म्ह्वः दँ पुचलय् खनेदुगु धासें स्वास्थ्यमन्त्री हृदयेश त्रिपाठीं चेन ब्रेक यायेत म्ह्वतिं ३० न्हु ब्वनेकू बन्द यानाः अनलाइनपाखें ब्वंकेबीत स्वयागु जानकारी बियादिल ।
मन्त्रालयस म्हिगः पत्रकारतलिसे खँ ल्हासें वय्कलं १८ दं क्वय्यापिनिगु लागिं खोप मदयेकूनिगुलिं नं संक्रमण पनेत विशेष ध्यान बी जरुरी जूगु धयादिल ।
मन्त्री त्रिपाठीं स्वनिगलय् जक ७÷८ लख विद्यार्थी छे्ँय् च्वनीबलय् २० प्रतिशत वयेवने म्ह्वः जुइगु धासें स्वनिगः लिसें १५ जिल्लाया तःधंगु शहरया ब्वनेकू लच्छि बन्द यायेत सीसीएमसीइ प्रस्ताव यानागु जानकारी बियादिल ।
मन्त्री त्रिपाठीं जेठ–असारय् संक्रमण न्हिं ११द्वः थ्यनेफुगु व सक्रिय संक्रमितया ल्याः ६ लख थ्यनीगु प्रक्षेपण याःगु खःसां अज्याःगु अवस्था वयेकेमबीगु धयादिल ।
लिपांगु इलय् कोरोना भाइरसया न्हूगु ताजि न्यनाच्वंगु व थुकिं मस्त तकं उच्च जोखिमय् दुगु मन्त्रालयं न्ह्यथंगु दु । न्हूगु भेरियन्ट्स याकनं पुनीगु व १८ दं क्वय्या मस्तय्के याकनं पुनीगु खनेदुगुलिं ब्वनेकू क्षेत्र आपाः जोखिमय् लाःगु मन्त्रालयया लिच्वः दु ।
Categorized in राष्ट्रिय
