थौं शहीद दिवस
राम डंगोल | पोहेलागा पारु११४१, माघ १६ शुक्रवाः
थौं शहीद दिवस । प्रजातन्त्र स्थापनाया नितिं थःगु जीवन बलिदान बिउगुपिनिगु सम्मानस्वरुप थौं शहीद दिवस हनाच्वंगु दु ।
तत्कालीन एकतन्त्रीय जहानियाँ राणा शासनविरुद्ध प्रजातन्त्रया नितिं थःगु ज्यान बलिदान बिया शहादत काःपिं प्यम्ह सपुत शुक्रराज शास्त्री, धर्मभक्त माथेमा, गंगालाल श्रेष्ठ व दशरथ चन्दयात मृत्युदण्ड बिउगु दिंया लुमंति माघ १६ गते शहीद दिवस हनावयाच्वंगु दु ।
वीर शहीदपिनिगु लुमन्ती विक्रम संवत् २०१२ सालनिसें येँ महानगरपालिकाया ग्वःसालय् छवाः तक्क माघ १० निसें १६ गतेतक्क ‘शहीद सप्ताह’ हनेगु यानाच्वंगु दु ।
छवाःतक्क ज्याझ्वःया लिपांगु दिं थौं शहीद उद्यान लैनचौरय् विशेष श्रद्धाञ्जलीसभाया ज्याझ्वः याना शहीद दिवस तःजिक्क हनाच्वंगु दु ।
शान्तिवाटिकाय् मुना नेपाल प्रहरी व सशस्त्र प्रहरीया ब्यान्ड, मार्चपास व शहीदया किपाः तयातःगु बग्गीलिसें प्रभातफेरी शहीद उद्यान लैनचौरय थ्यना श्रद्धाञ्जलीसभाय् परिणत जुल ।
उगु सभा प्रधानमन्त्री, मन्त्री, सरकार उच्चपदस्थ अधिकारी व जनप्रतिनिधि व सुरक्षा अंग प्रमुखपिनिगु नं ब्वति दूगु खः ।
वि.सं. १९९७ माघ १० गते निरंकुश राणा शासनविरुद्धय् नेपाल प्रजापरिषद् स्थापना याना जनतातयेत थःगु हक व अधिकारया नितिं क्रान्ति यायेत प्रेरित याःपिं शुक्रराज शास्त्रीयात टेकूइ, माघ १३ गते धर्मभक्त माथेमायात सिफलय् व माघ १५ गते गङ्गालाल श्रेष्ठ व दशरथ चन्दयात शोभाभगवती मृत्युदण्ड बिउगु खः ।
देशय् लिपांगु दिं ल्वापू व दुर्घटनाय् सीपिन्त तक्कं शहीद घोषणा यायेमाःगु व १०गू लखः आर्थिक ग्वःहालिया नितिं दबाब बिइगु प्रचलनं याना वास्तविक शहीद व शहीद परिवारपिं लिपालाना वयाच्वंगु दु ।
