बरिष्ठ पत्रकार, साहित्यकार लिसे संस्कृतिविद सुरेश किरण मानन्धरया लुमन्तिइ प्रकाशित जुगु सुरेश किरण स्मृतिग्रन्थ ४५ दिंया पुण्य तिथिइ छगु ज्याझ्वः दथुइ पितब्बज्या जुगु दु।

नेवाः पत्रकार राष्ट्रिय दबूया ग्वसालय् ये महानगरपालिका व नेपाल प्रज्ञा प्रतिष्ठानया सहकार्यय् स्मृतिग्रन्थ प्रकाशन जुगु खः। स्मृतिग्रन्थ मंकाः कथं भिक्षु कौडिण्य, डा. पुष्पराज राजकर्णीकार, रश्मिला प्रजापति, नेपाल आदिवासी जनजाति पत्रकार महासङ्घ (फोनिज)या अध्यक्ष लक्की चौधरी, प्रेस काउन्सिल नेपालया प्रमुख अधिकृत झविन्द्र भुषाल, नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठ, पूर्व अध्यक्ष श्रीकृष्ण महर्जन, सुरजवीर बज्राचार्य, बरिष्ठ कार्टुनष्टिपिन्स पितब्बज्या जुगु खः।

पत्रकार लिसे साहित्यकार सुरेश किरण भाषा आयोगया सदस्य तक जुयादीम्ह पत्रकारिता, साहित्य, संस्कृति ख्यलय् थीथी ख्यलय् योगदान यानादीगु खः। डा. पुष्पराज राजकर्णीकारं मानन्धरं पत्रकारितापाखे समाज रूपान्तरण यायेगुलि तधःगु योगदान दुगु खः लुमकादिल। समाजय् जुयाच्वंगु कुरीति, बेथिती व विसङ्गति विरुद्धय् वयकलं न्ह्याकूगु च्वसां मदिक न्ह्याकां च्वगुलि हे समाज रूपान्तरणय् वयकःया भूमिका दुगु खँ लुमकादिल।

फोनिजया अध्यक्ष लक्की चौधरीं मानन्धरया रचना व सिर्जनाय् सामाजिक रूपान्तरण यायेगुलि वयकलं यानादीगु साहित्य सिर्जना, च्वसा च्वया प्रस्तुतीकरणपाखे समाज रूपान्तरण अभियानय् योगदान यानादीगु दु धका धयादीगु खः। उगु ज्याझ्वलय् प्रेस काउन्सिलया प्रमुख अधिकृत झविन्द्र भुषालं पत्रकारिता आचार संंहिताय् नेपालभाषा पिकायेगुलि यानादीगु ग्वहालियात लुमकादिल।

नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठया सधाध्यक्षताय् जुगु उगु ज्याझ्वलय् भिच्छु कौडण्य, नेवाः देय् दबूया अध्यक्ष रश्मिला प्रजापति, नेपाल प्रजा प्रतिष्ठानया दुज अगिव बनेपालि, नेपालभाषा टाईम्सया उदेन न्हुसाय्मि, पुर्वमन्त्री राजेन्द्र श्रेष्ठ, सुनिल महर्जन, सुरेन्द्रभक्त श्रेष्ठपिन्स सुरेश किरण मानन्धरं पत्रकारितापाखे समाज व देय् याःगु यानादीगु योगदान बारे चर्चा यानादीगु खः। उगु सफूतिइ ९१ म्हेसिया च्वयादीगु खः।

Categorized in राष्ट्रिय