येँ/म्येहालामि पुरुषोत्तम श्रेष्ठया म्ये ‘सुथसिया निभाः’या कभर धेंधें बल्लाः कासाय् बिजु श्रेष्ठ न्हाप लाःगु दु ।

‘सुथसिया निभाः म्ये कासा’ या ग्वसाः खलः कन्फराक्टीभ मिडिया सोलुसनं शन्चरबाः किपुलिइ याःगु ज्याझ्वलये कासाय् न्हाप, ल्यू, लियांल्यू व हःपाः सिरपाः त्याकामि घोषणा यासें सिरपाः लःल्हाःगु खः ।

कासाय् न्हाप लाःम्ह विजु श्रेष्ठं छपु म्ये रेकर्डिङ व उगु म्येया म्यूजिक भिडियो सिरपाः त्याकादीगु दु । धेंधें बल्लाखय् केशव तण्डुकार ल्यू, मीना प्रजापति लियांल्यू लात सा मोहन दास श्रेष्ठं हःपाः सिरपाः त्याकादिल ।

तण्डुकार, प्रजापति व श्रेष्ठं नं छपु छपु म्ये रेकर्डिङ सिरपाः त्याकादीगु दु ।

वरिष्ठ संगीतकार अमरराज राजोपाध्याय, बुद्ध सायमि व सुमन कपाली दुथ्याःगु निर्णायक मण्डलं कासाया त्याकामिपिं ल्यःगु खः ।

कासा ज्वःछि ब्वतिमिमध्ये फेसबुकय् दकले अप्वः लाइक वःम्ह कासामि कृष्णा श्रेष्ठ व युट्युबय् दकले अप्वः भ्यूज वःम्ह कासामि चनेलाल मानन्धरयात गिफ्ट ह्याम्पर लःल्हाःगु खः ।

कृष्णा श्रेष्ठया भिडियोयात फेसबुकय् १३सः स्वयां अप्वः लाइक वःगु खःसा युट्युबय् मानन्धरया भिडियोया ७ हजार ७८२ भ्यूज दुगु खः ।

ज्याझ्वलय् कासाया विशेष ब्वतिमिकथं स्वम्ह मचा कासामियात नं हंगु खः । मचा कासामिपिं गौरव मणि शर्मा (४दँ), निर्भिक अमात्य (६दँ) व सात्विक राज शर्मा (८दँ) यात हंगु खः ।

अथेहे, दकले जिथिम्ह कासामि गौरीबाबा शर्मा (७६दँ) यात व नेवाः इतर ब्वतिमि कथं सैलेन्द्र थापा मगरयात नं हंगु खः ।

ज्याझ्वलय् न्ववासें कन्फराक्टीभ मिडियाया नायःलिसें ज्याझ्वः कजि बिराजकाजी राजोपाध्याय न्हूपिं प्रतिभा मालाः पिब्वयेगु आज्जुं कासाया ग्वसाः ग्वयागु धयादिल ।

ईल्वहँ प्रकाशनया प्रमुख सन्चालन अधिकृत दर्शनवीर शाक्यं बुदिंया म्ये कासा, छन्त जिगु माया मदुला थुज्वःगु कासा धुंकाः सुथसिया निभाः म्ये कासां नेवाः संगीत ख्यःयात गति ब्यूगु धापू तयादिल ।

ज्याझ्वलय् म्येहालामि पुरुषोत्तम श्रेष्ठलिसें सुरजबीर बज्राचार्य, भीम तुलाधरं नं म्ये हालाः न्ह्यब्वयादीगु खःसा मिनर्वा शर्मा राजोपाध्यायं चर्या हुलाप्याखं न्ह्यब्वयादीगु खः । 

Categorized in मनोरन्जन