सिरियाय् आर्थिक ग्वःहालि यायेगु उजुं
चिल्लागा तृतीया ११४१, चैत्र १८ बुधवाः
अन्तर्राष्ट्रिय दातृ निकायतय्सं सिरियाली नागरिकयात अर्बौ डलर ज्वलिंज्वःया ग्वाहालिया घोषणा याःगु दु ।
छगू दशक स्वयां ताः इलंनिसें गृहयुद्धय् दुगु सिरियाय् कोराना महामारीया हुनिं जनजीवन झन थाकूगु धासें थीथी दातृ निकायं ग्वाहालिया घोषणा याःगु खः ।
ताः ईया गृहयुद्ध व कोरोना महामारीया हुनिं देय्या अर्थतन्त्र क्वदःगु धासें उगु ग्वाहालिया घोषणा याःगु खः । सिरियाली नागरिकयात भोकमरीं बचे यायेत युरोपियन युनियनं ग्वसाः ग्वःगु दातृ सम्मलेनय् उगु ग्वाहालिया घोषणा जूगु अन्तर्राष्ट्रिय समाचार संस्थातय्सं न्ह्यथंगु दु ।
न्हापाया दँय् थें थुगुसी नं अर्बौं डलर ग्वाहालि यायेगु संयुक्त राष्ट्रसंघं नं प्रतिवद्धता प्वंकूगु दु । सिरियाय् थुगुसी करिब १ करोड नागरिकयात न्यूनतम मानविय ग्वाहालि आवश्यक दुगु राष्ट्रसंघया महासचिव एन्टोनियो गुटेरेसं धयादीगु दु ।
सन् २०११ लिपा सिरियाय् न्ह्यानाच्वंगु गृहयुद्धया हुनिं द्वलंद्वः मनूत सीधुंकल ।
Categorized in अन्तर्राष्ट्रिय
