नेपाल पुलिस क्लबयात न्हापांगु जीत
डंगोल | पोहेलाथ्व सप्तमी ११४१, माघ ७ बुधवाः
सुदूरपश्चिम प्रदेशयात ९गू विकेटं बुका विभागीय टिम नेपाल पुलिस क्लबं प्रधानमन्त्री कप पुरुष राष्ट्रिय छगू दिवसीय क्रिकेट धेँधेँबल्लाखय् न्हापांगु जित पिदंगू दु ।
सच्छि व ११गू रनया हाथ्याये पुलिसं छगू विकेट छ्वया १७गू ओभरय् हे थःगु हाथ्या ताःलात । सच्छि व ९८ग बल ल्यंदनिबलय् हे कासाः त्याकेत ताःलागू खः ।
पुलिसया लागि ओपनर सुनिल धमला व कुशल भुर्तेलं अर्धशतक दयेकल । सुनिलं ५३गू रन दयेका आउट जुल धाःसा कुशल ५१गू रन दयेका अविजित जुल । बलिङपाखे सुदूरपश्चिमया हेमन्त धामीं छगू विकेट काःगु खः ।
थ्वसिबें न्ह्यःया किपूया ख्यःलय् टस बुना ब्याटिङ याःगु सुदूरपश्चिमं ३३गू ओभर छग बलय अलआउट जूया सच्छि व १०गू रन जक दयेकेत ताः लाःगू खः ।
सुदूरपश्चिमया लागि खडक बोहोरां दकलये अप्वः ४० रन दयेकल । सन्जु धामी ३५, अरुण ऐर १३ व अर्जुज साउदं १०गू रन दयेकल ।
पुलिसया दिपेन्द्र सिंह ऐरी व सागर ढकालं ४गू–४गू विकेट काःगु खः । प्लेयर अफ दि म्याच सागर ढकाल जूल । थ्वः जितलिसें नेपाल पुलिस क्लब समूह ‘बी’ या स्वंगूगु झ्वलय् दु ।
निगू कासां ४गू ल्याः दयेकूगू बागमती प्रदेश धलःया न्हापांगु थासय् लानाच्वंगू दु । निगू ल्याः दूगु लुम्बिनी प्रदेश नेट रनरेटया लिधंसाय् २गूगु थासय् लानाच्वंगु दु ।
