अमेरिकां भारत यात्राय् प्रतिबन्ध तल
चौलागा पंचमी ११४१,बैसाख १८ सनिवाः
अमेरिकां भारतं जुइगु यात्राय् प्रतिबन्ध तःगु दु । भारतय् कोरोना महामारीं ग्यानापूगु अवस्था ब्वनलेधुंका अमेरिकां थुकथं निर्णय याःगु खः ।
अमेरिकी नागरिकया हकय् धाःसा थ्व प्रतिबन्ध लागु जुइमखु । ह्वाइट हाउसया प्रवक्ता जोन साकीं सेन्टर फर डिजिज कन्ट्रोल एण्ड प्रिभेन्सनया छ्यातालय् वइगु मंगबलाः निसें यात्रा प्रतिबन्ध लागू जुइगु जानकारी बियादील ।
प्रवक्ता साकीं भारतय् संक्रमितया ल्याः उच्च जुयावःगु व न्हूगु भाइरसया भेरियन्ट चिउताया विषय जूगु तकं धयादील ।
थ्वयान्ह्यः अमेरिकां १० गू लख डलर ज्वलिन्ज्वःया स्वास्थ्य ज्वलं भारत छ्वगु खः । महामारीया विकराल अबस्थाया हुनिं थी थी देशं भारतलिसेया यात्रा प्रतिबन्ध तयेधुंकुगु दु । बेलायतं भारतपाखें लिहाँवइपिन्त बाध्यकारी क्वारेन्टिनय् च्वनेमाःगु नियम लागू याःगु दु ।
लिपांगु ई भारतं कोरोना भाइरसया निगूगु घातक लहरयात फयाच्वंगु दु । अन न्हियान्हिथं संक्रमितया ल्याः ४गू लखया हाराहारीइ थ्यंगु दु । सीपिनि ल्याः नं अप्वयावनाच्वंगु दु ।
Categorized in अन्तर्राष्ट्रिय
