ताम्रकार समाजं थःगु स्वर्ण जयन्ती तःजिक हनं
चौलाथ्व सप्तमी ११४१,बैसाख ६ सोमवाः ( लहानान्युज
ताम्रकार समाजं थःगु स्वर्ण जयन्ती हंगु दु ।
ज्याझ्वलय् नवासें नेवाः देय् दबूया नायः नरेश ताम्रकारं नेवाः मुद्दा अले आन्दोलनयात सशक्त ढङ्गं न्ह्यःने यंकेत ताम्रकार समाजया योगदान उच्च दुगु धयादिल । ताम्रकारं मांभाय्या संरक्षण बिना थःगु पहिचान ल्यंकेमफइगु खँय् बः ब्युसें थौंया विद्यार्थीं थःगु मांभाय्या रक्षा यायेत न्ह्यज्यायेमाःगु बिचाः तयादिल ।
समाजया जेष्ठ नागरिक सम्मान उपसमिति व शिक्षा उपसमितिपाखें ताम्रकार समाज भवन जावलाख्यलय् ग्वसाः ग्वःगु स्वर्ण जयन्ती समारोहलय समाजया नायः रविन्द्र राज ताम्रकारं कोरोना भाईरस संक्रमण जोखिमया अवस्थां यानाः समाजया स्वर्ण जयन्ती तःजिगु ज्याझ्वः यानाः हनेमफूगु जानकारी बियादिल ।
थःगु भाषा, कला, संस्कृति सम्पदाया संरक्षण सम्बद्र्धनय् समाज न्ह्याबलें न्ह्यज्यानाच्वंगु व निरन्तर न्ह्यानाच्वनेगु धयादिल ।
उगु हे ज्याझ्वलय् ताम्रकार समाजपाखें ज्याःजंक्व क्वचाःपिं ३५ म्ह जेष्ठ नागरिकयात हंगु नं खः । देय् दबूया नायः व समाजका नायकं दोसल्ला न्ययेकाः जेष्ठ नागरिकयात विशेष सम्मान याःगु खः ।
अथे हे, समाजपाखें एस।ई।ई, उच्च मावि, स्नातक, स्नातकोत्तर तह उत्तीर्ण जूपिं करीब १२५ विद्यार्थीतयत नं ट्रफि व कदरपत्रया नापं नगदलिसें सम्मान याःगु खः ।
समाजका पूर्व नायःपिं धर्मकृष्ण ताम्रकार, श्याम गोविन्द ताम्रकार, निवर्तमान नायः अच्युत कृष्ण ताम्रकार अले वर्तमान नायः रविन्द्र राज ताम्रकारं विद्यार्थीतयत ट्रफी, कदर पत्र अले नगद लःल्हानादिल ।
