२०७७ माघ १२, सोमबार

अमेरिकी संसदया क्वयेया सदनय् ट्रम्पविरुद्धया महाअभियोग प्रस्ताव पारित

डंगोल | पोहेलाथ्व पारु ११४१, माघ १ बिहीवाः

अमेरिकी राष्ट्रपति डोनाल्ड ट्रम्पयात महाअभियोग तःगु दु । अमेरिकी संसदया क्वयेय्या सदनं ट्रम्पविरुद्धया महाअभियोग तयेगु प्रस्ताव पारित याःगु दु ।
थ्व नापं राष्ट्रपति ट्रम्प अमेरिकी इतिहासय् निक्वःखुसिइ महाभियोग लाःम्ह न्हाम्ह राष्ट्रपति जुयादीगु दु ।
वंगु बुधबाः अमेरिकी संसद् भवनय् हुलदङ्गा यायेत च्वछागु अभियोगय् राष्ट्रपति ट्रम्पविरुद्ध डेमोक्राट सांसदपिन्सं महाभियोग प्रस्ताव दर्ता याःगु खः ।
सार्वजनिक मत लिच्वः कथं महाभियोग प्रस्तावया पक्षय् २सः व ३२कू मत लाःगु दु । महाभियोग पारित जुइत २सः व १७कू मत आवश्यक जुइगु कानूनी व्यवस्था दु ।
क्वयेय्या सदनय् डेमोक्राटिक पार्टीया २सः व२२म्ह दुजः दु । तर ट्रम्पया दलया १० म्ह सांसदं महाभियोगया पक्षय् मतदान याःगु सभामुख न्यान्सी पेलोसीं दावी यानादीगु दु ।
महाअभियोग प्रस्तावया विपक्षय् सच्छि व ९७ म्ह रिपब्लिकन सांसद दूगु बीबीसीं न्ह्यथंगु दु । क्वयेय्या सदनं सन् २०२० य् नं वयेक विरुद्ध महाभियोग पारित याःगु खः ।
तर उगु इलय् छम्ह नं रिपब्लिकनं महाभियोगय् साथ मबिउगु खः । आः उगु प्रस्ताव च्वयेय्या सिनेटपाखें नं पारित जुइत ३ब्वय् निब्व बहुमत आवश्यक दु ।
संसदया च्वयेय्या सदनय् उगु ल्याः थ्यंकेत ट्रम्पया दलया सिनेटरपिनिगु नं साथ आवश्यक जुइगु धाःगु दु ।
म्होतिइ १७म्ह रिपब्लिकन सिनेटरपिन्सं ट्रम्पया विपक्ष व महाभियोगया पक्षय् मतदान याःसा जक वयेक पदमुक्त जुइगु धाःगु दु ।
३ब्वय् निब्व बहुमत आवश्यक जुइगुलिं डेमोक्राटपिनि हे बलय् जक सिनेटय् द्व द्वपं पुष्टि जुइत सभव मदु ।
तर रिपब्लिकनपिनि साथ चूलाना उगु महाअभियोग पारित जूसा उम्मेद्वार जुइके मबिइत मेगु मतदान यायेमा ।
थ्वयान्ह्यः क्वयेय्या सदनं संविधानया छगू प्रावधान कथं ट्रम्पयात पदमुक्त यायेत उपराष्ट्रपति माइक पेन्सयात ग्वहालि यायेगु प्रस्ताव पारित याःगु खः ।
पेन्सं उगु प्रस्ताव अस्वीकार यायेधुंका डेमोक्राटपिं महाभियोगया प्रक्रियाय् न्ह्यज्यागु खः । 
Categorized in अन्तर्राष्ट्रिय