नेकपा एमालेया संसदीय दलया मुँज्या थौं च्वनिगु, सूर्य चिंपाखें निर्वाचित जुपिन्त जक ब्वना
चौलाथ्व पंचमी ११४१, चैत्र ५ बिहीवाः
प्रधानमन्त्री लिसें नेकपा एमालेया नायः केपी शर्मा ओलीं संसदीय दलया मुँज्या सःतादीगु दु । प्रधानमन्त्री निवास बालुवाटारय् थौं ११ता ईया नितिं मुँज्या सःतूगु खः ।
मुँज्याय् सुद्र्यः चिंपाखें निर्वाचित जूपिं फुक्क सांसदयात मुँज्याय् सःतःगु एमाले प्रमुख सचेतक विशाल भट्टराईं जानकारी बियादील । नायः ओलीं संसदीय दलया मुँज्या सःतूसा नं माधवकुमार नेपाल व झलनाथ खनाल पुचः धाःसा मुँज्याय् दुमथ्याइगु जूगु दु ।
राष्ट्रिय ज्यासनामि मुना न्ह्यानाच्वंगुलिं संसदीय दलया मुँज्याय् दुथ्याये मफइगु माधव नेपाल पुचःया नेता योगेश भट्टराईं जानकारी बियादील । थौंया नितिं सःतूगु संसदीय दल प चैत ७ य् सःतूगु केन्द्रीय कमिटी मुँज्याय् तकं थःपिं दुथ्याये मफइगु नेता भट्टराईया धापू दु ।
सर्वोच्च अदालतया आदेश कथं एमालेयात संगठन व विचाःया कथं २०७५ सालया जेठ २ खय् लितयंकेत तयार जुइधुंका जक केन्द्रीय कमिटीया मुँज्याय् वनेगु नेपाल–खनाल पुचःया धिनां दु ।
वंगु फागुन २८ गतेया ओली पुचःया मुँज्यां भाला थुखेउखे नापं महत्त्वपूर्ण निर्णय यायेधुंका नेपाल–खनाल पुचः थप असन्तुष्ट दु ।
Categorized in राजनीति
