पार्टी हित अःखःया ज्यापहः यापिं नेतातय्त एमालें स्पष्टिकरण काइगु
चिल्लाथ्व नवमी, ११४१, चैत्र ८ आइतबाः
नेकपा एमालेया केन्द्रीय कमिटी मुँज्यां पार्टी हित अःखःया ज्यापहः याःगु धका वरिष्ठ नेता माधवकुमार नेपाललिसें ४म्ह नेतायात स्पष्टीकरण न्यनेगु निर्णय याःगु दु ।
प्रधानमन्त्री निवास बालुवाटारय् म्हिगः च्वंगु एमाले केन्द्रीय कमिटी मुँज्यां नेपाललिसें भीम रावल, घनश्याम भुसाल व सुरेन्द्र पाण्डेयात स्पष्टीकरण न्यनेगु निर्णय याःगु खः । उमिसं बिइगु स्पष्टीकरणया लिधंसाय् मुँज्यां आवश्यक निर्णय काइगु एमालें न्ह्यथंगु दु ।
अथेहे एमालेया केन्द्रीय कमिटीयात महाधिवेशन आयोजक कमिटीइ रुपान्तरण यायेगु निर्णय नं याःगु दु । आः कायम दूगु केन्द्रीय समितियात महाधिवेशन ग्वसाःखलः समितिइ रुपान्तरण यायेगु निर्णय जूगु प्रचार विभाग प्रमुख प्रदीप ज्ञवालीं जानकारी बियादील ।
आः एमालेय् २ सः व ६४म्ह दुजःया केन्द्रीय कमिटी दु । महाधिवेशन ग्वसाःखलः कमिटीइ नायः केपी शर्मा ओली व मूछ्याञ्जेय् ईश्वर पोखरेल जुयादी । मेपिं पदाधिकारी आवश्यकता कथं मेगु मुँज्यां ल्यइगु ज्ञवालीं धयादील । अथेहे ग्वसाःखलः समितिइ दूपिं दुजःपिनि कार्यविभाजन यायेत संगठन विभाग प्रमुख विष्णु पौडेल, नेतापिं टोपबहादुर रायमाझी व शंकर पोखरेल दूगु छगू कार्यदल गठन याःगु दु । केन्द्रीय कमिटी मुँज्या नेपाल व खनाल पक्षं बहिष्कार याःगु खः दु । मुँज्यां संसदीय दलया विधान नं पारित याःगु दु ।
थ्वयान्ह्यः च्वंगु संसदीय दलया मुँज्यां प्रमुख सचेतक विशाल भट्टराई नेतृत्वया कार्यदलं न्ह्यब्वगु संसदीय दलया विधान संशोधनलिसें पारित जूगु खः । न्हूगु विधान कथं दलया नेतां सांसदतयेत कारवाही यायेगु अधिकार बिउगु दु । विधानय् छुं नं दुजःलं पार्टी, संसदीय दल व देय्या हित विरुद्धय् ज्यापहः याःगु दलया नेतायात द्वपं लाःसा स्पष्टिकरण न्यनेगु व कारवाही यायेगु व्यवस्था याःगु दु । अथेहे दलया उपनेता दलया नेतां हे मनोनयन यायेगु व्यवस्था जूगु एमालेया मू सचेतक विशाल भट्टराईं जानकारी बियादील ।
थुखे असन्तुष्ट दूम्ह माधव नेपाल व झलनाथ खनाल पुचः धाःसा मुँज्याय् दुथ्यानामदी । उगु पुचःया सांसदपिं सोमप्रसाद पाण्डे, जीवनराम श्रेष्ठ व यज्ञराज सुनुवार मुँज्याय् दुमथ्यानागु हुनिं नापंया पौ ज्ना बालुवाटार थ्यंगु खः । प्रधानमन्त्री लिसें पार्टी नायः ओलीं थ्वयान्ह्यः सःतूगु केन्द्रीय कमिटी व संसदीय दलया मुँज्याय् नं नेपाल खाला पुचः वंगु खनेमदूगु खः ।
मुँज्याय् दुथ्याम्ह नेता वामदेव गौतमं धाःसा पार्टी वइगु दिंलय् एकता प्रक्रियाय् न्ह्याइगु धयादीगु खः । वंगु पुस ५ गते प्रतिनिधिसभा विघटनलिपा तत्कालिन नेकपा व साविकया एमालेय् निगुलिं पक्षया मुँज्या मुनाय् दुमथ्याम्ह गौतम न्हापांखुसिइ म्हिगः जूगु दलया मुँज्याय् दुथ्यानादीगु खः ।
प्रतिनिधिसभा विघटन प्रधानमन्त्रीया असंवैधानिक पलाः जूगु धका सर्वोच्च अदालतय् रिट निवेदन ज्वना सांसद सांसद कृष्णभक्त पोखरेंलं नं बालुवाटारया संसदीय दलया मुँज्याय् दुथ्यानादीगु खः
