अमेरिकां थःगु सेना सेप्टेम्बर ११ लिपा लितःसतेगु
चौलाथ्व द्धितीया ११४१,बैसाख १ बुधवाः
अमेरिकी राष्ट्रपति जो बाइडेनं वइगु सेप्टेम्बर ११ लिपा अमेरिकी सेना अफगानिस्तानं लितसःतेगु धयादीगु दु । राष्ट्रपति बाइडेनं थःगु सेना लितसःतेगु खँय् याकनं हे घोषणा याइगु बीबीसीं न्ह्यथंगु दु ।
थगुने पूर्व अमेरिकी राष्ट्रपति डोनाल्ड ट्रम्पं थःगु सेना लितसःतेत तालिवानीतयेलिसे सहमति यानादीगु खः । सन् २००१य् अमेरिकाया विश्व व्यापार केन्द्र व पेन्टागनय् जूगु आतंकवादी हताःया २०क्वःगु वार्षिकीलिसें अफगानिस्तानय् दूगु अमेरिकी सेना लितसःतेगु घोषणा जुइगु अधिकारीतयेसं न्ह्यथंगु दु ।
राष्ट्रपति बाइडेनं थ्वयान्ह्यः मे १ य् ओरिकी सेना लितसःतेगु धाःसा नं उकिया मिति छुं लिपा लिछ््यागु खः । कट्टरपन्थी इस्लामिकतये आन्दोलनय् तालिवानीतयेसं हिंसात्मक ज्यापहः म्हो मयाःगु धका अमेरिकी व उत्तर एटलान्टिक सन्धि संगठन (नाटो) या अधिकारीतयेसं पूर्व प्रतिवद्धता कथं शान्ति कायम यायेत इनाप याःगु दु ।
अफगानिस्तानय् शान्तिया नितिं तालिवानीतयेत दच्छिया ई ई सीमा बिउगु दु । उमित दच्छि दुने थःगु फुक्क हिंसात्मक ज्यापहः त्वःता मूलधारया राजनीतिइ वयेत अमेरिकां ख्याच्वः बिउगु धाःगु दु ।
थुखे विद्रोहीतयेसं धाःसा अमेरिकां थ्वयान्ह्यः तक्वःमछि याःगु प्रतिवद्धता पूमवंकुगुलिं थुगु निर्णयप्रति नं थथें विश्वस्त जुइ मफइगु लिच्वः बिउगु दु ।
अमेरिकी सेना लितसःतेगुया मिति अझं औपचारिक कथं क्वजिइज्या मजूगुलिं अफगान व तालिवानीतये दथुइ जुइगु धाःगु वार्ताया खँय् क्वजिइज्या जूगु मदुनि ।
Categorized in अन्तर्राष्ट्रिय
