भागरथी भट्टयात बलात्कार लिपा स्याःगु पुष्टि
पोहेलागा त्रयोदशी ११४१, माघ २७ मंगलवाः
बैतडीया दोगडाकेदार गाउँपालिकास्थित जंगलय् विभत्स अवस्थाय् लूम्ह स्थानीय १७ दँया किशोरी भागरथी भट्टयात बलात्कार लिपा स्याःगु पुष्टि जूगु दु ।
जिल्ला अस्पताल बैतडीं जिल्ला प्रहरी ज्याकूयात सोमबाः ब्यूगु पोष्टमार्टम रिपोर्टय् भागरथीयात बलात्कार लिपा स्याःगु धयातःगु दु ।
बैतडीया प्रहरी प्रमुख प्रहरी नायव उपरीक्षक नारायणप्रसाद अधिकारीं भट्टयात बलात्कार धुंकाः स्याःगु रिपोर्ट वःगु जानकारी बियादिल ।
थ्वयां न्ह्यः, घटनास्थलया प्रकृति स्वयेबलय् नं बलात्कार धुंकाः स्याःगु आशंका याःगु खः । माघ २१ गते ब्वनेकू वंम्ह भागरथी सनिलय्तक्क नं छेँय् लिहां मवयेधुंकाः मालावंबलय् माघ २२ गते छेँ लिक्कया लबलेक जंगलय् विभत्स व पचिनांगां मृत अवस्थाय् लूगु खः । भागरथीया म्हया थीथी अंगय् निलडाम व घाः, योनीं हि बाः वनाच्वंगु खः । बलात्कार धुंकाः स्याःगु पुष्टि जूगुलिसें प्रहरीं अपराधी लुइकेगु ज्यायात तच्वयेकागु धाःगु दु ।
किशोरीया ‘भेजाइनल स्वाब’ परीक्षणया लागिं राष्ट्रिय विधि विज्ञान प्रयोगशालाय् हःगु दु । डिएनए परीक्षणया लागिं स्वाब लिसेंया नमूना मुंकूगु खः ।
थःथितिपिन्सं हत्यारा मलूतल्ले सीम्ह मकायेगु अडान तःगु दु । सुदूरपश्चिम प्रदेश प्रहरी ज्याकूया प्रमुख प्रहरी नायब महानिरीक्षक उत्तमराज सुवेदीया टोली घटनास्थलय् थ्यंकाः अध्ययन यानाच्वंगु दु ।
थ्वयां न्ह्यः, सुदूरपश्चिम प्रदेश प्रहरी ज्याकूया वरिष्ठ उपरीक्षक जनकराज पाण्डे नेतृत्वया अनुसन्धान टोली, केन्द्रीय अनुसन्धान ब्युरोया वरिष्ठ प्रहरी उपरीक्षक पञ्चकुमार बाँखुलिसें प्राविधिक टिम परिचालन जूगु खः । भागरथीयात न्याय बीमाःगु व दोषी लुइकेमाःगु माग लिसें जिल्लास्थित राजनीतिक दल नं छथाय् दंगु दु । घटनाया विरोधय् जिल्लाया थीथी थासय् प्रदर्शन जुयाच्वंगु दु ।
Categorized in अपराध
