नेपालभाषाया मे “भ्वासि जुया.....” सार्वजनिक
चौलागा पंचमी ११४१,बैसाख १८ सनिवाः
कोरोना जेखिमया ईलय् जूगु निषेधाज्ञा लिसलिसें नेपालभाषाया सांगीतिक ख्यलय् थीथी संगीत त सृजना जूगु दू धाःसा म्युजिक भिडियो त नं यक्वः ल्याखय् सार्वजनिक जूगु दु ।
थ्वहे सन्दर्भय थुगुसी लकडाउन जूगु छन्हू न्ह्यः बुधबार मेहालामि सुमन श्रेष्ठं हालादिगु न्हूगु मे “भ्वासि जुया...”या म्युजिक भिडियो सार्वजनिक जूगु दु ।
नेपालभाषा फिल्म क्षेत्रय् ल्वंह्वाम्ह कलाकार रुपेन्द्र श्रेष्ठ थक्वाःमि व न्हूम्ह अभिनेत्री मुस्कान राजभण्डारीया अभिनय दुगु उगु म्युजिक भिडियोलय् रबिन्द्र श्रेष्ठया नं अभिनय स्वकूमिपिन्सं स्वयेफइ । चन्देश्वर महर्जनया च्वयादिगु व सुरेन्द्र श्रेष्ठया लय्चिनादिइगु खः ।
नेपालभाषा फिल्म क्षेत्रया ल्वकंह्वाम्ह निर्देशक रामकृष्ण खड्गीया निर्देशनय् जूगु म्युजिक भिडियोया छायाँकार रकि महर्जन व सम्पादन बालकृष्ण वंशी जुयादि ।
वंगु बुधबाः यलः पुच्वया एम्बियन्स ३६५ य् छगू ज्याझ्वः याना उगु म्युजिक भिडियो सार्वजनिक याःगु खः ।
ज्याझ्वलय् जन संगीत श्रेष्टा संगीतकार अमरराज शर्मा राजेपाध्यायं म्ये न्यनेधुंका थःगु युवाकालया स्मृति ताजा जूगु धयादिल । अथेहे भजन साम्राज्ञी रमन श्रेष्ठं गायिका सुमन श्रेष्ठ नेपालभाषा संगीत ख्यःया बाँलाम्ह प्रतिभा खः धयादिल ।
ज्याझ्वलय् वरिष्ठ फिल्म पत्रकार विजयरत्न असंबरें मे हालामि श्रेष्ठ व नवअभिनेत्री राजभण्डारीं कला क्षेत्र थःगु थाय् कायेत ताःलाईगु सम्भावना दूगु विचाः तयादिल ।
