छुं नं क्षेत्रय् विशेष योगदान ब्यूपिं व्यक्तित्वयात सम्मान यायेगु झीगु सामाजिक संस्कार खः । सम्मानित जुइपिंत हौसला दइ । विशेष प्रोत्साहनया सञ्चार जुइ । उकें हरेक व्यक्ति सम्मानया आसाकुति जुइ। सञ्चारकर्मय् थःत देछाइपिं अप्वः सञ्चारकर्मीया आज्जु दां जक मखु नां नं कमे यायेगु, समाजय् सम्मानित जुइगु जुइ । उकी नं सञ्चार ख्यलय् पुरस्कार व सम्मानया यक्व महत्व दु।

थ्व भूमिका तयागु अर्थ हिसि मिडियाया प्रकाशन लहना वाःपौ नं बिइगु सिरपाःया बारे चर्चा यायेत खः। ब्यावसायिक पत्रकारिता, थौंया आवश्यकता’ धइगु नारा ज्वनाः नेपालभाषाया ख्यलय् थनिं –झिँस्वदँ न्ह्यः पिदंगु ‘लहना’ वाःपौया बार्षिकोत्सव ज्याझ्वः दँय्दसं हिसि मिडियां तःजि हनेगु याः। उगु ज्याझ्वलय् नेवाः ख्यःलिसें नेपाःया थीथी सञ्चार माध्यमपाखें नेवाः जाति, भाषा, कला, संस्कृतिया आदिया संरक्षण व सम्बद्र्धन यायेगु ज्याय् योगदान बिया वयाच्वंपिं नेवाः पत्रकारपिंत नं सिरपाः लःल्हायेगु ज्या जुयाच्वंगु दु।

लहनां थःगु वार्षिकोत्सवय् थीथी पत्रकारिता सिरपाः बिया नेवाः पत्रकारतय्गु हौसला अभिवृद्धि यानाच्वंगु दु। लहना धर्म– मोति पत्रकारिता सिरपाः, लहना सूर सम्मान, ‘लहना पञ्चवीर सिरपाः, लहना मोहनी सिरपाः, लहना न्यू जेनिथ पत्रकारिता सिरपाः हिसि मिडियां बियाच्वंगु छुं छुं पत्रकारिता सिरपाःया छुं दसू खः। लहनां बिइगु पत्रकारिता सिरपाः पाखें यक्व पत्रकारतं सम्मानित जुइ धुंकल। उकिं जि नं छम्ह भाग्यमानी खः । नेपालभाषा व खस नेपाल नेपाली भाषाया पत्रपत्रिकाय् निगू दशक न्ह्यःनिसें च्वसु च्वयाः नेवाः जाति भाषा, लिपि, साहित्यया प्रचारप्रसारलिसे संरक्षण व संद्धर्धन यायेगु निरन्तरा ब्यगू धासें लहना धर्म–मोती पत्रकारिता सिरपाः ११४० पाखेँ जित हंगु खः । लहनां बिइगु थीथी सिरपाः मध्ये धर्म–मोती पत्रकारिता सिरपाः दकलय् प्रतिष्ठित सिरपाः खः । थ्वः पत्रकारिता पुरस्कारपाखें जि सम्मानित जुइ न्ह्यः नेपालभाषाया लिजेन्ड पत्रकारत मध्ये मदुम्ह सुरेश किरण मानन्धर, श्रीकृष्ण महर्जन, राजु शाक्य, हिमेश वज्राचार्य व शोभा श्रेष्ठयात धर्म–मोती पत्रकारिता सिरपाः लःल्हाःगु खः ।

उकिं नं जिं थ्व सिरपाः ग्रहण यानाबलय् थःत गौरवान्वित तायेका । थ्व सिरपाः नं जितः यक्व खुशी व सन्तुष्टि बिल । अथे ला सिरपाः कायेखनाः सु लय्मतासें च्वनेफइ । यद्यपि जिगु खुशी छाय् अप्वः जुइ थें च्वं धाःसा जिगु डेढ दशकया पत्रकारिता जीवनय् थ्व छगूयां छगू जक नेपालभाषा पत्रकारिता सिरपाः खः। अथे ला अप्वः खस भासं खेल पत्रकारिता यानागु जुलिं नं जुइफु। अथेखःसां जिं नेपालभाषां च्वयावयागु छगूत्या दशक दयेधुंकल । थःगु कर्म याना च्वनागु झ्वलय् यक्वः सिरपाःया हकदार जुइ धुन ।

दसूया नितिं बेस्ट स्पोर्ट्स जर्नलिस्ट अवाडं २०७०, राष्ट्रिय खेलकुद परिषद् उत्कृष्ट खेल पत्रकारिता पुरस्कार २०७२, दशरथ चन्द उत्कृष्ट स्पोर्ट्स जर्नलिस्ट अवार्ड, पारामाउन्ट स्पोर्ट्स जर्नलिस्ट अवार्ड २०७८, नेपाल ओलम्पिक कमिटी बेस्ट स्पोर्ट्स जर्नलिस्ट अवार्ड, नेप्लिज तेक्वान्दो एकेडेमी स्पोर्ट्स जर्नलिस्ट अवार्ड, व्यायाम मन्दिर उत्कृष्ट स्पोर्ट्स जर्नलिस्ट अवार्ड, बुद्धिचाल महासंघया पत्रकारिता अवार्ड, सीतापाइला तेक्वान्दो खेल पत्रकारिता अवार्ड आदि । अथेहे नेपालभाषा मास्टर्सय् गोल्डमेडलिस्ट जुयाः सत्यतारा सिरपाः २०७८, विराट सुरत्न सिरपाः मोतालानी सिरपाः, श्रेष्ठ पदक, पियुष पदक कायेत नं ताःलात ।

थ्वः सङग्रहालय् दुगु नेपालभाषा पत्रकारिताया न्हापाखुशी व छगू जक सम्मान लहना धर्म पत्रकारिता सिरपाःया महत्व जिगु लागि विशेष जुइगु हे जु। जिगु व्यवसायिक पत्रकारिता न्ह्याःगु २०५८ सालय् गोरखापत्रपाखें खः। गोरखापत्रय् कासा व कला संस्कृति पृष्ठया कजिं जुयाः ज्या यानाच्वना। नेपालभाषा प्रति मायां हे थौंकन्हय् गोरखापत्रय् नेवाः कला–संस्कृति सम्बन्धी बुखँयात प्राथमिकता बियाच्वना ।

नेवाः कला–संस्कृति सम्बन्धी बुखँ तुलनात्मकम रुपय् थौंकन्हय् अप्वः प्रकाशित जुयाच्वंगु दु धाःसा पाइमखु। अथेहे तत्कालीन ‘सन्ध्या टाइम्स’ (आः नेपालभाषा टाइम्स) य् कासाःया लेख च्वया नेपालभाषा पत्रकारिताय् पलाः न्ह्याकागु खः । लिपा लहना वाःपौ लय् स्तम्भकार कथं हे निरन्तर लेख च्वयेगु याना । नेवाः पत्रकार राष्ट्रिय दबू, येँ पाखेँ प्रकाशन जूगु नेवाः जः लय्पौलय् सहसम्पादकया भूमिका नं निर्वाह याना । नेवाः टेलिभिजन व एफएमय् नियमित कथं कासा ख्यःया खँल्हाबँल्हाया निंतिं सहभागी जुयाच्वनागु दु। नेपालभाषा पत्रकारिताय् जिगु संलग्नताया निंतिं नेवाः पत्रकार राष्ट्रिय दबूयात सुभाय् बी हे माः।

नेवाः पत्रकार राष्ट्रिय दबुलिइ दुहां वयेधुंकाः जिगु पत्रकारिताया दायरा तब्याना वंगु खः।अफिसपाखें जिम्मेवारी मब्यूसां नेपालभाषाया बुखँ थःगु पत्रिकापाखेँ प्रकाशन यायेगु जिम्मेवारी तायेका । नेवाः पत्रकारत अप्वः म्हसियावल । थुकें नं जितः छुं भचा लवः दत । अन्तय् नेवाःख्यलय् सम्मान यक्व जू। यद्यपि अप्वः सम्मान छगू दोसल्ला व प्रमाणपत्र बियाः याःगु खनेदु। लहना धाःसा थुकिया छुं अपवाद धाःसां ज्यू । सुरुआत निसें हे व्यवसायिक पत्रकारिताया सः थ्वयेका च्वंम्ह लहनां आकर्षक नगद पुरस्कारपाखें पत्रकारतय् सम्मान यानाच्वंगु दु। अझ लहना ज्याझ्वःया शै ली उलि हे भव्य कथं जुइ । उकिं नं लहना पत्रकारिता सिरपाः नेवाः पत्रकारतय्सं पिया च्वनीगु व गौरव तायेकीगुजुयाच्वंगु दु धाःसा पाइमखु।