येँ मेगु निगु थासय् वाटर एटीएम सञ्चालनय् हंगु दु । येँया वडा १० बानेश्वरय् छक्कुपक्कु पार्क व वडा ४ या शंखपार्कय् महानगरया मेयर व उप मेयरं मंकाः कथं एटीएमया उलेज्या यानादीगु खः ।

‘वाटर भेन्डिङ मेसिन’ य् सिक्का तया कप व लः कया उलेज्या यानादीगु खः। वं स्वया न्ह्य वंगु माघ २९ गते शंखधर पार्क (रत्नपार्क) टिकट काउन्टर नाप, स्वयम्भु भगवान पाउ व बालाजु उद्यान प्रवेशद्वार नाप उगु वाटर एटीएम स्टेशन सञ्चालनय् हये धुकुगु खः ।

उगु थासय् महानगरं ‘जरुंहिति’ नां बिगु खः । महानगरं वंगु ०७६ चैत ९ गते स्वच्छ त्वनेय्गु लः उपलब्ध यायेत स्मार्ट वाटर भेन्डिङ् मेसिन (वाटर एटीएम) तयेगु निति काठमाडौं उपत्यका खानेपानी व्यवस्थापन बोर्ड नाप सम्झौता याःगु खः ।

येँ महानगरया मेयर शाक्यं स्मार्ट सहरया लागि स्मार्ट सुविधा जडान यायेगु ज्या थःगु प्राथमिकताय् दु धका धयादीगु खः । उपप्रमुख हरिप्रभा खड्गी श्रेष्ठं लःया समस्या समाधान जुगु हे तधःगु उपलब्धि खः धक धयादीगु खः।

महानगर नाप जुगु सम्झौता कथं थीथी थासय् वाटर एटीम स्थापना यायेगुलि वइगु स्वदँया दुने तक सञ्चालन व्यवस्थापन यायेगु ज्या बोर्डं याइ । महानगरपालिकां एटीम तइगु थासय्, मत व सुरक्षा उपलब्ध याना बिइ।

Categorized in राष्ट्रिय