राष्ट्रिय मिसा लिगया उपाधि सशस्त्र प्रहरीया एपीएफयात
लहानान्युज | सिल्लाथ्व अष्टमी ११४१, फागुन ८ सनिवाः
राष्ट्रिय मिसा लिग फुटबलया उपाधि सशस्त्र प्रहरीया एपीएफं त्याकुगु दु । म्हिगः जूगु लिगया लिपांगु कासाय् ल्यु त्याकामि त्रिभुवन आर्मी क्लबया ३÷० या गोल अन्तरं बुका एपीएफ सत्प्रतिशत लिच्वः नापं मदिक्क ३क्वःखुसिइ च्याम्पियन जुइत ताःलाःगु खः । त्रिपुरेश्वरस्थित दशरथ रंगशालाय् जूगु कासाय् एपीएफयात त्याकेत सरु लिम्बुं निगू लिसें अनिता केसीं छगू गोल याःगु खः ।
उपाधि नापं एपीएफं १५गू लख, ल्यु त्याकामि आर्मीं ८गू लख, लियांल्युु त्याकामि नेपाल पुलिस क्लबं ५ गू लख व ४गूगु थासय् लाःगु वालिङ नगरपालिकां ३गू लख ध्यबा त्याकुगु दु ।
७गू टोली दुथ्यागु निताजि लिग प्रणालीइ जूगु धेंधेंबल्लाय् एपीएफं १२गू कासां ३६गू, आर्मीं २६गू, ३गूथु थासय् लाःगु पुलिसं १८गू ल्याः चूलाकुगु दु ।
लिपांगु कासाय् शुक्रबाः पुलिसं चौदण्डीगढी नगरपालिकायात १०÷० या तःधंगु गोल अन्तरं बुका ३गूगु थासय् लाःगु खः ।
४गूगु थासय् लाःगु वालिङया १७गू, ५गूगु थाय्या विराटनगर महानगरपालिकाया १६गू, ६गूगु थाय्या चन्द्रपुर नगरपालिकाया ९ गू लिसें दक्वःलय् लिउने लाःगु चौदण्डीगढी अंकविहीन जुल ।
थुखे, सशस्त्रया सरु लिम्बु सर्वोत्कृष्ट कासामि जुल । वयेकलं यामाहाया स्कुटर चूलाकादील ।
अथेहे सशस्त्रया सावित्रा भण्डारी उत्कृष्ट फरवार्ड, पुलिसया अमृता जैशी उत्कृष्ट डिफेन्डर, आर्मीया विमला चौधरी उत्कृष्ट मिडफिल्डर, पुलिसया उषा नाथ उत्कृष्ट गोलकिपर व सशस्त्रया भगवती थापा उत्कृष्ट प्रशिक्षक ल्येय्ज्या जुल । उत्कृष्ट सकसिनं म्हतिं ५० द्वः ध्यबा चूलाकुगु दु ।
Categorized in कासा
