राष्ट्रिय मिसा लिग फुटबलय् थौं एपिएफ व विराटनगर दथुइ कासा, कासा मबूसा एपिएफं लिगया उपाधि त्याकीगु
सिल्लाथ्व षष्ठी ११४१, फागुन ५ बुधवाः
राष्ट्रिय मिसा लिग फुटबलय् शिर्ष थाय्या सशस्त्र प्रहरीया नेपाल एपिएफ क्लबं थौं विराटनगर महानगरपालिकालिसे म्हितेत्यंगु दु ।
एन्फा मैदान सातदोवाटोय् न्हिनय् ३ताः इलय् जुइगु कासां लिग त्याकामि क्वःछिगु सम्भावना दु । थुगु कासाय् एपिएफं त्यात वा ज्वलिंज्वः यानाः बु जक मबूसां शुक्रबाः जुइगु आर्मी विरुद्धया कासा न्ह्यः हे एपिएफ लिग च्याम्पियन जुइ । थौं एपिएफ बुत धाःसा लिगया निर्णय लिपांगु दिंया कासा याइ । थौं हे जुइगु न्हापांगु कासाय् त्रिभुवन आर्मी क्लबं नेपाल पुलिस क्लबलिसे म्हिती ।
लिग त्याकेगु गणितिय संभावना जक म्वाकातयेत सां आर्मी क्लबं थौंया कासा त्याके हे माः । न्ह्यानाच्वंगु लिगय् म्हिगः रौतहटया चन्द्रपुर नगरपालिकां उदयपुरया चौदण्डीगढी नगरपालिकायात २–१ बुकल ।
न्ह्यानाच्वंगु लिगय् आःतक्कया दक्वं ११ कासा बूगु चौदण्डीगढी ल्याः मदुगु अवस्थाय् लिग धलःया दक्कले ल्यूने दु । शिर्ष थाय्या एपिएफया १० कासां ३० ल्याः दु ।
उलि हे कासा म्हिताः २५ ल्याः मुंकूगु आर्मी क्लब निगूगु थासय् दु ।
Categorized in कासा
