पितृसत्तात्मक बिचाःया हुनिं महिला हिंसा न्यूनिकरणय् हाथ्या अप्वःल : नायः कमला पराजुली
लहनान्युज | सिल्लागा नवमी ११४१, फागुन २३ आइतवाः
नेपाःया हरेक संयन्त्रय् पितृसत्तात्मक सोच दुगु हे हुनिं महिला हिंसा न्यूनिकरणय् हाथ्या अप्वःगु राष्ट्रिय महिला आयोगाय नायः कमला पराजुलीं धयादीगु दु ।
नेवाः पत्रकार राष्ट्रिय दबू केन्द्रीय समिति महिला विभागं ग्वसाः ग्वःगु अन्तरक्रियाय् नवासें आयोगया नायः पराजुलीं पितृसत्तात्मक बिचाः मिजंतय्के जक मखुसें राज्यया थीथी संयन्त्रय् तकं दुगुलिं थुकियात न्हंकेत सकसिके जागरण आवश्यक दुगु धयादिल ।
सच्छि व ११क्वःगु अन्तर्राष्ट्रिय श्रमिक महिला दिवसया अवसरय् ग्वसाः ग्वःगु ज्याझ्वलय् नवायेगु झ्वलय् संयुक्त राष्ट्र संघं थुगु दिवसयात महिला दिवस जक धाःसां थुकिया सुरूवात श्रमिक महिलां ज्वलिंज्वः पारिश्रमिक बीमाःगु माग याःगु व दक्वं मिसा श्रमिक जूगु हुनिं श्रमिक महिला दिवस धाये पाय्छि जुइगु वय्कःया धापू खः ।
ज्याझ्वलय् महिला हिंसा न्यूनिकरणया लागिं क्रियाशील पत्रकारत मीरा (उषा) लोहनी, लक्ष्मी पुन व सम्झना महर्जनया लिसें समाजसेवी गीता गुरूङ्गयात दोसल्लां न्ययेकाः हनापौलिसें सम्मान याःगु खः ।
महिला हिंसा न्यूनिकरणय् पत्रकाराय भूमिका विषयक अन्तरक्रियाय् मानव अधिकारया लागिं महिला एक महिला पुचःया संस्थापक नायः अले राष्ट्रिय महिला आयोगया दुजः लिलि थापा व सिविन नेपालया कार्यकारी निर्देशक सुम्निमा तुलाधरं मिसा व मस्तय्सं फयाच्वंगु हिंसाया घटना सम्बन्धय् थःगु खँ तयादीगु खः ।
मानव अधिकारका लागिं महिला एकल महिला पुचःया नायः कुन्ता शर्मां नेपाल सरकारया थीथी प्रावधानबारे लक्षित पुचलय्तक्क उगु सुचं थ्यनेमफुनिगु धयादिल ।
पत्रकार दबूया केन्द्रीय नायः सुरजवीर बज्राचार्यं दबुलिं राज्यया असमान ब्यवहारया हे हुनिं नेवाः पत्रकार संगठित जुगु धयादिल ।
