हलिंयंकया नेवाःपिन्त कःघाना “विश्व नेवार दिवस” हनिगु
चिल्लाथ्व दशमी ११४१, चैत्र १० मंगलबाः
हलिंयंक थीथी थासय् च्वनाच्वंपिं नेवाः समुदायपिन्त छप्पं छधि यायेगु तातुना हलिं नेवाः दिं अर्थात् “विश्व नेवार दिवस” हनेगु जूगु दु । वल्र्ड नेवाः अर्गनाइजेशन नेपाल च्याप्टरया ग्वसालय् मंगलबाः छगू पत्रकार सम्मेलन याना बसन्तपुरया डबलीइ शनिबार उगु दिवस हनिगु जानकारी बियादिल ।
ज्याझ्वःया कजि सुरेन्द्रभक्त श्रेष्ठं ज्याझ्वलय् विशेषांक विमोचन, नेवाः समाज व नेपालभाषा विकास यायेगु ज्याय् योगदान ब्यूपिं च्याम्ह विशिष्ट मनूतय्त सम्मान यायेगु जानकारी बियादिल । पत्रकार सम्मेलनय् प्रचार–प्रसारया कजि नविन जोशीं नांजाःम्ह म्येँ हालमि मदुम्ह रमेश ताम्राकारया लुमन्तिइ नीस्वनातःगु सिरपा लःल्हाइगु जानकारी बियादिल ।
शनिवाः जुइगु ज्याझ्वलय् नेपाः व चीनं हलिंया च्वका सगरमाथा सफल आरोहण याःम्ह कल्पना महर्जनयात न नगदनाप विशेष सम्मान याइगु जानकारी ब्यूगु दु ।
येँ महानगरपालिकाया मेयर विद्यासुन्दर शाक्यया मू पाहाँसुई जूगु ज्याझ्वलय् विशेषाङ्क विमोचन यासें ज्याझ्वलय् नेवाःया हाथ्या व ह्वःताः विषयलय् बहसया ज्याझ्वः तकं जुइगु धागु दु । बहसया नितिं नागरिक न्ह्यलुवा मल्ल के सुन्दर, परराष्ट्रविद् हिरण्यलाल श्रेष्ठ व डाक्टर महेशमान श्रेष्ठ मू वक्ता कथं दइगु धागु दु । सन् २०१८ निसें मार्चया लिपांगु शनिवाः वल्र्ड नेवाः अर्गनाइजेसन दिवस हनेगु घोषणा कथं थुगुसिइ न जुइत्यंगु खः ।
समारोहस नेवाः साहित्य क्षेत्रय् योगदान बिउपिं पूर्खापिनिगे किपाः ब्वज्या, नेवाःपिनिगु तजिलजि व नसाः ज्वलंया स्टल, नांजापिं कलाकार लिसें संघसंस्थापिनिगु प्रस्तुती दइगु ग्वसाखलकं न्ह्यथनादिल ।
सन् २०१८ निसें मार्चया लिपांगु शनिबाःया दिंनिसें न्यायेका वयाच्वंगु उगु दिवस वंगु दँय् कोभिडया हुनिं दिकेमाःगु खः ।
