येँ महानगरपालिका अन्तर्गतया सामुदायिक स्कूलय् ब्वंकीगु स्थानीय विषयया पाठ्यसफू ‘येँ देय् म्हसीके’ सार्वजनिक जूगु दु ।

वंगु शुक्रबाः येँ महानगरपालिकाया शिक्षा विभागं राष्ट्रिय सभागृहस भव्य ज्याझ्वः यासें सफूया विमोचन याःगु खः । ज्याझ्वलय् शिक्षा, विज्ञान तथा प्रविधि मन्त्री कृष्णगोपाल श्रेष्ठलिसें येँ महानगरपालिकाया प्रमुख विद्या सुन्दर शाक्यं मंकाः रुपं उगु सफूया विमोचन यानादिल । ‘येँ महानगरपालिकां स्थानीय शिक्षाया क्षेत्रय् ऐतिहासिक व साहसिक ज्या याःगु दु,’ ज्याझ्वलय् नवासें मन्त्री श्रेष्ठं धयादिल, ‘क्वय्या तगिमंनिसें हे येँ देय् म्हसीके पाठ्यक्रम लागू यानाः स्थानीय भाषाया लागिं लजगाःया ह्वःताः तकं ब्वलंकूगु दु ।’ ख नं खः, नेपालभाषा ब्वने थाकु धाइपिन्त स्थानीय विषय स्थानीय भाषां हे ब्वने दइबलय् मचा इलंनिसें हे नेपालभाषां ब्वनेगु बानी नं जुइगु जुल अले च्वय्या तगिमय् थ्यनीलबय् नेपालभाषा विषय हे कयाः ब्वनीपिं विद्यार्थीत नं अप्वइगु खनेदु ।

ब्वनीपिं अप्वइगु धइगु हे ब्वंकीपिं नं व हे कथं मालीगु जुल । अले नेपालभाषाया शिक्षकपिनिगु माग अप्वइबलय् लजगाः ब्वलनीगु जुल । उलि जक मखु, नेपालभाषाया छ्यलाबुला अप्वयावःलिसे थुकिं मेमेगु ख्यलय् तकं लजगाःया ह्वःताः थम्हं हे विकास यानायंकीगु निश्चित दु । सफू विमोचनया हे ज्याझ्वलय् मन्त्री श्रेष्ठं उपत्यका नगरपालिका फोरमया नायः तकं खःम्ह महनगर प्रमुख शाक्ययात आः बुलुहुँ म्ह्वतिं नं स्वनिगः दुने थुगु शिक्षा लागु याकेगु एजेण्डा ज्वनाः न्ह्याःवनेत सुझाव बियादिल ।

थःगु नुगः खँ तय्गु झ्वलय् प्रमुख शाक्यं येँ देय्या मौलिकता थुइकेत थन हे भाषा मसय्कं मफइगु जूगुलिं स्थानीय भाषां हे स्थानीय विषयया पाठ्यक्रम लागू यानागु धयादिल । ‘यःमरि, मरुहिति, क्वहिति, थँहिति आदि थुज्वःगु खँग्वःत मेगु भाषां थुइके फइमखु, थज्याःगु खँत थुइकेगु जक मखु, विद्यार्थीतय्सं आत्मसात तकं याय्फय्मा धकाः स्थान विशेषया अवलोकन भ्रमणसहित स्थानीय भाषां हे पाठ्यक्रम तयार यानागु खः’ शाक्यं धयादिल । नेवाःतय् बाहुल्यता दुगु येँय् दुने ७७ गुलिं जिल्लाया नागरिक च्वनीगु जूगुलिं थनया लःफय्, तजिलजि, परम्पराबारे जानकारी बीगु आज्जजुं थुगु शिक्षा लागु यानागु नं वय्कलं जानकारी बियादिल ।

उपप्रमुख हरिप्रभा खड्गी श्रेष्ठं नं थनया गुथि–परम्परा, जात्रा–पर्व लिसेंया विषयवस्तु विदेशय् तकं जानकारी बीत थुगु शिक्षा उपयोगी जुइगु बिचाः तयादिल । पाठ्यपुस्तक व पाठ्यक्रम च्वज्याया शुरुनिसें ज्या यानावःम्ह वरिष्ठ संस्कृतिविद् डा. चुन्दा वज्राचार्यं थुगु सफू नेपालभाषां च्वयातःगु खःसां भाय् स्यनीगु सफू मखूगु धयादिल । थुगु सफुतिं येँया मौलिक सभ्यताया जानकारी बीगु वय्कःया धापू खः ।

आधारभत तह कक्षा १ निसें कक्षा ८ तक्क खःसां आः कक्षा १ निसें ४ तक्कया पाठ्यपुस्तक जक विमोचन याःगु खः । कक्षा ५ निसें ८ तक्कया सफू नं याकनं पिथनेगु येँ महानगरपालिका शिक्षा विभागं न्ह्यथंगु दु । नेपालया संविधानया भाग ३ मौलिक हक अन्तर्गत धारा ३२ या उपधारा (२) व (३) य् देय्या हरेक स्थानीय तहपाखें थः मातहत दुगु सामुदायिक व संस्थागत विद्यालयतय्सं स्थानीय पाठ्यक्रमया रूपं थम्हं छगू विषय अध्ययन अध्यापन याकेफइगु व्यवस्था दु । येँ महानगरपालिकां व हे व्यवस्था अन्तर्गत थुगु पाठ्यपुस्तक तयार याःगु खः ।