कुपोषणया सिकार जुल यमनया मस्त
सिल्लाथ्व द्धितिया ११४१, फागुन १, शनिबाः
यमनय् ५ दं क्वय्या बच्छि स्वयां अप्वः मस्त कुपोषणया सिकार जुइगु याःगु संयुक्त राष्ट्रसंघं न्ह्यथंगु दु ।
ताः इलंनिसें द्वन्द्वग्रस्त यमनय् भोकमरीया हुनिं ४ लख स्वयां अप्वः मस्त सीगु राष्ट्रसंघया तथ्यांकय् न्ह्यथनातःगु दु ।
थुगुसी जक करिब २ लखत्या मस्त कुपोषणया सिकार जुइगु राष्ट्रसंघं चेतावनी ब्यूगु दु । कुपोषणया समस्या ज्यंकेत तत्काल क्वात्तूगु पलाः मल्ह्वंसा मस्तय् मृत्युदर अझ थहां वनेफुगु राष्ट्रसंघं न्ह्यथंगु दु ।
राष्ट्रसंघया जनसंख्या विभाग प्रमुख डेभिड ब्यासलें सन् २०२० या तुलनाय् नसाया मगाःमचालय् कुपोषणया सिकार जुइपिनिगु ल्याः २२ प्रतिशतं थहांवनीगु दावी यानादीगु दु ।
अथे हे, प्वाथय् दुपिं, मस्तय्त दुरु त्वंकेमाःपिं १२ लख मिसात नं अत्याधिक कुपोषणं ग्रसित जुइगु राष्ट्रंघं प्रक्षेपण याःगु दु ।
यमनय् सन् २०१४ निसें होथी विद्रोहीं न्ह्याकातःगु युद्धया हुनिं लखौ सर्वसाधारण विस्थापित जुइगुया लिसें कयौं सीगु दु । युद्ध ह्यानाच्वंगु दनिगुलिं यमनया करिव ८० प्रतिशत नागरिकयात ग्वाहालि माःगु राष्ट्रसंघया अनुमान दु ।
Categorized in अन्तर्राष्ट्रिय
