अमेरिकां यमनयात वियावयाच्वंगु ग्वहालि दिकेगु घोषणा
पोहेलागा अष्टमी ११४१, माघ २३ शुक्रवाः
यमनविरुद्ध न्ह्यानाच्वंगु युद्धय् अमेरिकी समर्थन व हतियारया ग्वहालि दिकेगु अमेरिकां घोषणा याःगु दु ।
राष्ट्रपति जो बाइडनं यमनय् न्ह्यानाच्वंगु युद्धय् थ्वसिवे न्ह्यः यानावःगु ग्वहालि आवलिं अमेरिकां मयाइगु घोषणा यानादीगु दु ।
साउदी अरेबियाया नेतृत्वय् जुयाच्वंगु आक्रामक कारबाहीयात बियावःगु अमेरिकी समर्थन व हतियार मिइज्या दिकेगु राष्ट्रपति बाइडेनं स्पष्ट यानादीगु दु । यमनय् ६दँनिसें युद्ध जुयाच्वंगु दु ।
थ्वहेदथुइ १गु लख १०द्व मल्याक मनूत सीधुंकूगु दु । विदेश नीतिबारे थःगु न्हापांगु न्वचू तयाः राष्ट्रपति जो बाइडनं यमनय् आवलिं युद्ध दिकेमाःगु धयादिल ।
युद्धं मानवीय व रणनीतिक विनाश याइगु जुयाः आवलिं युद्ध दिकेगु बाइडेनया धापू दु । बाइडन स्वयां न्ह्यःया निम्ह राष्ट्रपतिया कार्यकालय् अमेरिकां यमनय् विद्रोहीविरुद्ध साऊदी अरबया नेतृत्व यानाः गठबन्धनयात ग्वहालि याःगु खः ।
Categorized in अन्तर्राष्ट्रिय
