Display Style:
Column Style
अष्ट्रेलियाय् लकडाउन १११ दिं लिपा अन्त्य
रमित | कौलाथ्व त्रयोदशी ११४०,कार्तिक १३ बिहीवाः
अष्ट्रेलिया तधःगु शहर मेलबर्नय् कोरोना भाइरस महामारीका कारण लकडाउन १११ दिं लिपा बुधवाः अन्त्य याःगु दु। थुगु लकडाउन मेमे थाय् स्वया अप्वो दिं तक याःगु खः।
लकडाउन खुल्ला यायेवं स्थानीयपिन्स राहत व सहजता महसुस जुगु समाचारय् न्ह्य थःगु दु।
भिक्टोरिया राज्य सरकारं लकडाउन अन्त्य यायेगु घोषणा याये वं उगु थासय् व्यापारिक प्रतिष्ठान चाइगु दु। उमिसं कारोबार यायेगु शूरु जुगु दु।
लकडाउन खुल्ला याःसा सतकय् हुलमुल मयायेत, मास्क मतसे पिहा मवयेत धाःगु दु। अथेहे छेँय् निसे २५ किलोमिटर तापाक्क वने मदइगु व्यवस्था याःगु दु।
सरकारी अधिकारीपिन्स फयाफतले छेँय् च्वना ज्यायायेत आह्वान याःग्ु दु।
भिक्टोरिया अष्ट्रेलियाय् कोरोना भाइरसया निक्वःगु लहरया संक्रमणया केन्द्र जूगु थाय् खः। कोरोना भाइरसया संक्रमण जुलाई ९ निसे निक्वःगु पटक लकडाउन याःगु खः।
लकडाउन विरुद्ध प्रदर्शन तक जूगु खः। संक्रमणपि म्हो जुया वगुलि लकडाउन छ्वासुकूगु खः।
फ्रान्स सरकारं देय्यकं निक्वःगु लकडाउन लागु
रमित | कौलाथ्व त्रयोदशी ११४०,कार्तिक १३ बिहीवाः
कोरोना संक्रमणया निक्वःगु लहर अप्वोया वःगुलि फ्रान्स सरकारं देय्यकं निक्वःगु लकडाउन लागु याःगु दु। थुगु लकडाउन पूरा नोभेम्बर महिनाय् तक लाःगु जुइ धका धाःगु दु।
फ्रान्सया राष्ट्रपति इम्यानुयल म्याक्रो राष्ट्रया नामय् सम्बोधन यासे थौं शुक्रवाः निसे लकडाउन लागु जुइगु जानकारी बिःगु दु। लकडाउनया इलय् अत्यावश्यक ज्या बाहेक छेँय् न पिहा मवनेत धाःगु दु।
स्वास्थ्य क्षेत्र, स्कुल व उद्योग धाःसा चायेके दइ। रेष्टुरेन्ट्स, बार थे जाःगु व्यवसाय बन्द जुइगु दु।
फ्रान्सय् कोरोना संक्रमणया कारण सीपिनिगु आँकडा अप्रिल महिना लिपा दकलय् अप्वो जुगु खः। मंगलवाः जक छन्हु हे ३३ हजार न्हुपि संक्रमित पिहावःगु खः।
राष्ट्रपति म्याक्रो न देय् यकं कोरोना संक्रमणया निक्वःगु लहर खतराया स्तरमा थ्यःगुलि न्हापा स्वया आः न खतरनाक जुइगुलि छु न शंका मदुगु धका धाःगु दु।
राष्ट्रया नामय् सम्बोधन यासे राष्ट्रपति म्याक्रो न महामारीयात तुरुन्त रोके यायेगु लागि कठोर जुइ माःगु धका धाःगु खः। सम्बोधनया झ्वलय् म्याक्रो न फ्रान्सया अस्पतालया दक्को आईसीयू बेड बिरामीपि जाःगु जानकारी बिःगु खः।
सामाजिक भेटघाटय् प्रतिबन्ध याःगु दु। ज्याय् वनेगु लागि, मेडिकल अपोइन्टमेन्टया लागि, थःथिति ग्वाहालिया लागि, अत्यावश्यक सामग्री न्यायेगु लागि व पिने वया ताजा फय्या लागि छेँय् न पिहा वये फइ धका धाःगु दु।
नयाँदिल्लीइ ग्यानापूसे च्वक वायु प्रदुषित
लहानान्युज | कौलाथ्व द्धादशी ११४०,कार्तिक १२ बुधवाः
भारतया केन्द्रीय राजधानी नयाँदिल्ली सहरया वायु यक्को प्रदुषित अवस्थाय् थ्यःगु दु।
दिल्ली प्रदुषण नियन्त्रण समितिं म्हिगः मंगलवाः बिःगु जानकारी कथं नयाँदिल्लीया वायुमण्डलय् प्रदुषणया अवस्था न्हिया न्हिथं अप्वोया वःगु दु धका धाःगु दु।
रोहिणीय् ३४६, आरके पुरामय् ३२९, आनन्द विहारय् ३७७ व मुँड्काय् ३६३ वायु गुणस्तर सूचक (एक्वुआई) दुगु धका समितिं धाःगु दु। थ्वा सूचकं प्यःगु हे थासय् याःगु अवस्था यक्को प्रदुषित खनेदुगु धका अधिकारीपिन्स धाःगु खः।
वायु गुणस्तर सूचक शून्य निसे ५० तक दुगुसा बालाःगु, ५१ निसे १०० तक दुगु सन सन्तोषजनक, १०१ निसे २०० तक दसा विचारणीय वा चिन्ताजनक, २०१ निसे ३०० तक प्रदुषित, ३०१ निसे ४०० तक यक्को प्रदुषित व ४०१ निसे ५०० तक तसक बामलाःगु माने याइ।
केन्द्रीय प्रदुषण नियन्त्रण वोर्ड नं नयाँदिल्लीया प्रदुषण तसक बामलाःगु पाखे वना च्वंगुलि च्युता प्वकूगु दु।
प्रदुषण चिन्ताजक अवस्थाय् थ्यःगुलि दिल्ली प्रदेश सरकारया वातावरणमन्त्री गोपाल राइ न प्रदुषण न्यूनीकरणया लागि राजधानी क्षेत्रय् जनचेतना मूलक ज्याझ्वः तत्काल सुरु यायेगु घोषणा याःगु दु।
सरकारी अधिकारीपिन्स वःगु शनिवाः हे नयाँदिल्लीया प्रदुषण अवस्था बामलाःगु धका जानकारी बिइ धुकुगु दु। उमिसंं उगु इलय् वायु प्रदुषण जुगु निन्हु लिपा अझ अप्वो जुइगु पूर्वानुमान याःगु खः।
उमिगु कथं नयाँदिल्लीमा विशेष यान शनिवाः मेगु दिं स्वया अप्वो वायु प्रदुषण जुइ धका धाःगु खः।
नयाँ दिल्ली विश्वया हे दकलय् अप्वो प्रदुषित सहरया रुपय् म्हसिया वयाच्वंगु थाय् खः। प्रदुषित वायुया कारण नयाँदिल्लीइ मौसम व जलवायु चक्रय् तक समस्या वयाच्वंगु दु।
भारतय् कोरोना सक्रमित म्हो जुया वनाच्वन
लहानान्युज | कौलाथ्व एकादशी ११४०,कार्तिक ११ मंगलवाः
भारतय् कोरोना भाइरसया सक्रमण स्वला लिपा म्हो जुगु दु।
सरकारी अधिकारीपिन्स बिःगु जानकारी कथं वःगु स्वलालिपा थौं मंगलवाः ४० हजार स्वया कम संक्रमित पिहावःगु दु।
केन्द्रीय स्वास्थ्य तथा परिवार कल्याण मन्त्रालयं वःगु २४ घण्टाया दुने भारतय् ३६ हजार ४७० म्ह संक्रमित जूगु धका धाःगु दु। थ्व नाप भारतय् कूल संक्रमितपि ७९ लाख ४६ हजार ४२९ म्ह थ्यःगु दु।
अथेहे भारतय् कोरोना सक्रमणं छगू लाख १९ हजार ५०२ म्ह सी धुकुगु दु। उकि मध्ये ४८८ म्ह वःगु २४ घण्टाय् सीगु दु।
कोरोना भाइरस सङ्क्रमणमुक्त जूपि ७२ लाख १०७० म्ह थ्यःगु दु धका धाःगु दु। सरकारी निकाय नं भारतय् कोरोना भाइरसमुक्त जूपि ९०.६२ प्रतिशत थ्यःगु दु धका धाःगु दु।
अथेहे कोरोना भाइरस संक्रमितपि १.५० प्रतिशत मनूत जक सीगु दु धका मन्त्रालयं धाःगु दु।
भारतय् छगु वाःन्ह्यनिसे कोरोना भाइरस संक्रमित व सी सा छु वाः निसे म्हो जुयावया च्वंगु दु धका धाःगु दु।
फ्रान्सेली उत्पादन मन्यायेत टर्कीया राष्ट्रपति रेचेपया इनाप
लहानान्युज | कौलाथ्व एकादशी ११४०,कार्तिक ११ मंगलवाः
टर्की सरकारं फ्रान्सेली उत्पादन मन्यायेत जनतापिन्त अपील याःगु दु।
टर्कीया राष्ट्रपति रेचेप तैयप एर्दोआनं कट्टरवादी मुस्लिमयात फ्रान्सं दमन याःगु धाःसे फ्रान्सले उत्पादन जुगु सामान मन्यायेत अपील याःगु खः।
टेलिभिजन सम्बोधनयासे राष्ट्रपति एर्दोआनं, यदि फ्रान्सय् मुसलमानपिन्त दमन जूसा विश्वया नेता मुसलमानया सुरक्षाया लागि न्ह्यने वने माः धका धयादिगु खः।
फ्रान्सेली राष्ट्रपति इमानुअल म्याक्रो न कट्टरवादी इस्लामया विरोधय् धर्मनिरपेक्षताया सुरक्षा यायेगु धका धाःगु खः। म्याक्रोया थुगु अभिव्यक्तिं टर्कीया राष्ट्रपति एर्दोआनं कूखिउगु खः।
फ्रान्सया छगू कक्षाय् पैगम्बर मोहम्मदय कार्टुन क्यःगु द्धपनय् उम्ह शिक्षकया स्यागुलि इस्लामयात कया विवाद उत्पन्न जूगु खः।
१६ अक्टुबरय् स्यामुअल पेटी नां दुगुम्ह उम्ह शिक्षकया १८ दँ दुम्ह अब्दुल्लाह अन्जोरोफं छ्य ध्यना स्याःगु खः।
