Display Style:
Column Style
त्रिपोलीइ जूगु आक्रमणय् ४०म्ह सित
लहनान्युज | ने.सं. ११३९ दिल्लाथ्व पारु (३ जुलाइ, २०१९), बुधवाः
लिवियाया ट्रिपोली लिक्क छगू आप्रवासी बन्दीगृहस जूगु हवाई आक्रमणय् लानाः ४०म्ह मनूत सीगु दुसा ८०म्ह स्वयां अप्वः मनूत घाःपाः जूगु दु । सीपिं अप्वः धइथें अफ्रिकी आप्रवासी खः ।
लिबियाया तटीय क्षेत्र जुयाः यूरोप दुहां वनीपिं अवैध आप्रवासीपिन्त नियन्त्रणय् कयाः बन्दीगृहस तयातःगु खः । उगु हे थासय् आक्रमण जूगु खः ।
राष्ट्रसंघीय सहयोगय् परिचालित सरकारया प्रधानमन्त्री फयज अल सिरां उगु आक्रमणय् स्थानीय स्वघोषित हिंसात्मक पुचः लिबियाली राष्ट्रिय सेनाया संलग्नता दुगु धयादीगु दु ।
थ्व स्वयां न्ह्यः वंगु सोमवाः उगु पुचलं हवाई आक्रमणया तयारी यानाच्वंगु धाःगु खः । अथे खःसां थुगु आक्रमणय् थःपिनिगु संलग्नता मदुगु उगु पुचःया प्रवक्ताया दावी दु ।
अवैध आप्रवासी नियन्त्रणय् तयेत सरकारं दयेकातःगु थजाःगु बन्दीगेहया दयनीय अवस्थायात कयाः मानवाधिकारवादी संस्थापाखें कुंखिना वयाच्वंगु खः । थजाःगु बन्दीगृह विशेष यानाः तनावग्रस्त थासय् लिक्क तयातःगु दु ।
कांग्रेस अध्यक्ष राहुल गान्धीं राजीना बिल
लहनान्युज | दिल्लाथ्व पारु ११३९ (जुलाइ ३ २०१९)
राहुल गान्धीं कांग्रेस अध्यक्ष पदपाखे राजीना बिगु दु । लोकसभाया चुनावय् पार्टीपाखे बुगु जिम्मेवारी थःम्हसिया कासे कांग्रेसया अध्यक्ष पदपाखे राजीना बिगु खः ।
नेता राहुलं राजीनाया घोषणा नाप छगु ट्वीट याःगु खः । मेपिन्त न जवाफदेही याये न्ह्य थःनि जवाफदेही जुइ माःगु धका धकयादिगु खः । पार्टी विस्तारया लागि जवाफदेही महत्वपूर्ण खः धासे थुगुु कारण थःम्हसिया कांग्रेस अध्यक्षपाखे राजीना बियागु धका उगु पत्र धाःगु खः।
चीनलिसेया व्यापार युद्धयात कयाः ६सः कम्पनीपाखें अमेरिकी राष्ट्रपतिया ध्यानकर्षण
लहनान्युज | ने.सं. ११३९ तछलाथ्व द्वादशि (१४ जुन, २०१९), शुक्रवाः
अमेरिकां चीनलिसेया ब्यापार युद्ध मदयेका छ्वयेत मागलिसें ६सः स्वयां अप्वः कम्पनीपाखें अमेरिकाया राष्ट्रपति डोनाल्ड ट्रम्पयात ध्यानाकर्षण पौ लःल्हाःगु दु ।
चिनियाँ हलंज्वलनय् कर अप्वयेकूगु इलय् अमेरिकी ब्यापार व उपभोक्तापिन्त लिच्वः लाइगु धासें वालमार्ट इंक, टार्गेट कोर्पलिसेंया कम्पनीं राष्ट्रपति ट्रम्पया ध्यानाकर्षण याकूगु खः ।
करबृद्धि निगुलिं देसया हीतय् मदुगु नं उमिगु दावी दु । ह्वाइट हाउसं धाःसा तत्काल प्रतिकृया ब्यूगु मदुनि ।
अमेरिकां चिनियाँ हलंज्वलनय् कर अप्वयेकूसा व्यापारय् लिच्वः लाइगु धासें कृषि, उत्पादन ख्यः, खुद्रा विक्रेता नापं प्रविधि उद्योग आबद्ध १५०गू स्वयां अप्वः उद्योगीतसें करबृद्धि विरोधी राष्ट्रिय अभियान हे न्ह्याकूगु दु ।
ताःई न्ह्यःनिसें बहसया विषय जुयाच्वंगु चीन व अमेरिकी ब्यापार युद्धयात इलय् हे सम्बोधन मयाःगु स्थिति बिचाः मयाःकथं जुइगु धासें थ्व स्वयां न्ह्यः नं उद्योगीतसें अमेरिकाया ध्यानाकर्षण याकेधुंकूगु दु ।
जापानया ओसाका शहरय् जुन २८ व २९ तारिखय् जुइगु जी २० सम्मेलनय् निगू देय् दथुइ थुगु विषयस वार्ता जुइफइगु अनुमान यासें उद्योगीतसें हाकनं सरकारया ध्यानाकर्षण याकूगु खः ।
हलिंया तःधंगु अर्थतन्त्र दुगु देय् दथुइया ल्वापुं फुक्क हलिंयात लिच्वः लाकीगु जूगुलिं याकनं समस्या ज्यंकेमाःगु विज्ञपिनिगु सुझाव दु ।
अमेरिकां चीनपाखें आयात याइगु ३गू खर्ब बराबरया हलंज्वलनय् २५गू प्रतिशत कर थकायेगु क्वःछीधुंकूगु दु ।
हिंसात्मक प्रदर्शन लिपा हङकङया सरकारी ज्याकु बन्द
लहनान्युज | तछलाथ्व एकादशी (जुन १३ २०१९)
हिंसात्मक प्रदर्शन लिपा हङकङया सरकारी ज्याकु बन्द जुगु दु ।
प्रदर्शनकारी तयेगु मिखाय् हङकङया सरकारी हेर्डक्वार्टर जःखः ज्याकुु बन्द याःगु दु । चीनपाखे सुपुर्दगी प्रक्रिया न्ह्यने यकिगु हङकङया विधायिका परिषद्ं विधेयक हःसा निसे छगु दिं न्ह्य निसे हङकङ अशान्त जुया वना च्वंगु खः ।
विधेयक त्रुटिपूर्ण जुगुु धासे लितकाये माःगु मागयाना वया च्वगु खः । अय्न बेवास्ता यासे विधेयकय् छलफल न्ह्याका यकिगु प्रयास जुया च्वंगु खः । उकिगु विरोधय् प्रदर्शनकारी तयेस कडा रुपं प्रदर्शनत न्ह्यने वया च्वंगु खः ।
निगु चरणया छलफल लिपा विधायिका परिषद्ं बुधवाः हाकन बिधेयक हयेगु कुतः जुगुनि प्रदर्शनकारि उग्र रुपं न्ह्यने वःगु खः । थुगु प्रदर्शन हङकङय् आतक दकलय् तधःगु कथ कयातःगु दु ।
विवादास्पद सुपुर्दगी सम्बन्धी विधेयकयात कया न्ह्यानाच्वंगु प्रदर्शनं उग्र रुप काय् वः मुख्य भूमि चीनपाखे सुपुर्दगी यायेगु विधेयकबारे छलफल लिपा यायेगु धका स्थगन याःगु खः।
मेक्सिकोलिसे जूगु सम्झौताया छुं छुं बुँदा सार्वजनिक
लहनान्युज | ने.सं. ११३९ तछलाथ्व दशमि (१२ जुन २०१९), बुधवाः
अमेरिकाका राष्ट्रपति डोनाल्ड ट्रम्पं अवैध आप्रवासीयात थःगु देशय् दुहाँ वइगुया नियन्त्रण सम्बधय् मेक्सिकोलिसे जूगु सम्झौताया छुं छुं बुँदा सार्वजनिक यानादीगु दु ।
सम्झौताय् आप्रवासीया नितिं क्षेत्रीय शरणार्थी शिविरया योजना दुगु धयातःगु खः, गुगु थ्व स्वयां न्ह्यः मेक्सिकिोया विदेशमन्त्रीं वार्तालिपा न्ह्यथनेधुंकूगु दु ।
अमेरिका दुहां वये इच्छादुपिं थीथी ल्याटिन अमेरिकी देशया नागरिकयात थुगु शिविरय् तयेगु धाःगु दु । नापं मेक्सिकों ४५न्हुया दुने देशया कडा सीमा सुरक्षा सम्बन्धि कानून लागू यायेगु प्रतिबद्धता नं याःगु विबिसीं न्ह्यथंगु दु । थौंकन्हय् मेक्सिकोय् ग्वाटेमालालिसेया सीमा क्षेत्रय् ६द्वःम्ह सुरक्षाकःमि तैनाथ यानाच्वंगु दु ।
मेक्सिकोलिसेया सम्झौताय् न्ह्यथनातःगु फुक्क जानबारी बी चाहे मजूगु राष्ट्रपति ट्रम्पया धापू खः । मेक्सिकों पाय्छि इलय् थःम्हेस्यां उगु सम्झौतायात कयाः खुलासा याइ धइगु चाहना दुगु राष्ट्रपति ट्रम्पं धयादिल । यदि मेक्सिकों ४५न्हुया दुने अवैध आप्रवासीत अमेरिका दुहां वइगु ज्यायात मपन धाःसा मेमेगु देशयात तकं लिच्वः लाइगु खनेदु ।
अबैध आप्रवासीया ट्रान्जिट जुयाच्वंगु ब्राजिल, ग्वाटेमाला, पनामालिसेंया देशलिसे नं थ्व सम्बन्धय् सहलह जुइफइगु विविसीं न्ह्यथंगु दु ।
अवैध आप्रवासी पनेत अमेरिकां मेक्सिकोया पूवंक हे प्रतिबद्धता चाहे जूसा व नं सम्भव दुगु विश्लेषकपिनिगु धापू दु ।
