Display Style:
Column Style
बन्दुकधारीया गोलिं लानाः प्यम्ह सित
लहना न्यूज | ने.सं. ११३९ दिल्लागा द्वादशि (२९ जुलाइ, २०१९), सोमवाः
अमेरिकाया क्यालिफोर्निया राज्यय् छम्ह बन्दुकधारीं गोलिं कयेकूगु इलय् प्यम्ह सीगु दु ।
स्थानीय ईकथं म्हिगः आइतवाः सनिलया ५ताः ई जुयाः ४१गू मिनेटय् क्यालिफोर्नियाया छगू गार्लिक फेष्टिभलय् बन्दुकधारीं गोलिं कयेकूगु इलय् प्यम्ह मनूत सीगु खःसा १५म्ह घाःपाः जूगु प्रहरीं न्ह्यथंगु दु । सीपिं मध्ये छम्ह संदिग्ध बन्दुकधारी जूगु खँ धाःगु दु ।
फेष्टिभलय् वःम्ह म्ये हालामि ज्याक भ्यान ब्रिनं आक्रमणकारी वाउँगु लं फिनातम्ह व बन्दुक ज्वनाच्वंगु खँ धाःगु दु ।
मेम्ह प्रत्यक्षदर्शीकथं आक्रमणकारीं फेष्टिभल जुयाच्वंगु थासं पिने तयातःगु बार चानाः दुहांवःगु खः ।
मेटल डिटेक्टर व सुरक्षाकःमियात छले यायेत अथे याःगु खः । प्रहरीं बन्दुक आक्रमणय् निम्ह/स्वम्ह दुथ्यायेफूगु खँ धाःगु दु । घटनायात कयाः अनुसन्धान जुयाच्वंगु दु ।
स्वन्हुया नितिं न्ह्याःगु उगु फेष्टिभल बन्दुक आक्रमणलिपा बन्द जूगु दु । अमेरिकाय् आमनागरिकयात नं बन्दुक तयेत छुट दु । फुक्कस्यां बन्दुक तयातइगुलिं इलय् ब्यलय् थजाःगु आक्रमणय् लानाः निर्दोष मनूत सिनाच्वंगु दु ।
बन्दुक तये दइगु खँय् प्रतिबन्ध तयेमाःगु माग जूसां नं अमेरिकां बन्दुकयात प्रतिबन्ध तयेगु कानून दयेकेफूगु मदुनि ।
हङकङय् आन्दोलन झन् तच्वया वन
लहना न्यूज | ने.सं. ११३९ दिल्लागा द्वादशि (२९ जुलाइ, २०१९), सोमवाः
हङकङय् लोकतन्त्र समर्थकतसें याःगु ब्वज्याय् प्रहरीं दमन याःगु धासें आन्दोलन अझ तच्वया वंगु दु ।
म्हिगः आइतवाः निन्हुया दिनस जूगु ब्वज्याय् चीन सरकारया ज्याकुथियात ताः तयाः ब्वज्या यानाच्वंगु इलय् प्रहरीं प्रदर्शनकारीपिन्त अश्रु ग्यास व रबरया गोलि कयेकेवं आन्दोलन अझ तच्वयावंगु विबिसीं न्ह्यथंगु दु ।
प्रहरीं कयेकूगु रबरया गोलि व अश्रु ग्यासया हुनिं सलंसः मनूत घाःपाः जूगु खः । हङकङ द्वीपया साई वेन व कजवे बे लागाय् द्वलंद्वः प्रदर्शनकारीतसें ब्वज्या याःगु खः ।
सरकार विरोधी आन्दोलनया च्यागूु वालय् थ्यनाच्वंगु इलय् हलिंया हे शान्त शहरकथं कयातःगु हङकङय् स्वतन्त्रता पक्षधरत सरकारपाखें हे असुरक्षित महसूस जूगु धासें आन्दोलनय् कुहांवःगु इलय् प्रहरीया दमनं यानाः हिंसा झन् तच्वयावंगु खः ।
लिपांगु इलय् न्ह्यानाच्वंगु विरोध प्रदर्शन, प्रहरी व नकावधारी दथुइ जूगु हिंस्रक ल्वापुया हुनिं हलिंया हे शान्त शहरकथं नांजाःगु उगु लागा आपराधिक गिरोहत च्वनीगु थाय्कथं म्हसीया
वनाच्वंगु दु ।
अमेरिकाय् १६दँ लिपा मृत्युदण्डया सजाँय कार्यान्वयन जुइगु
लहना न्यूज | ने.सं. ११३९ दिल्लागा नवमि (२६ जुलाइ, २०१९), शुक्रवाः
अमेरिकां १६दँ लिपा मृत्युदण्डया सजाँय कार्यान्वयन याइगु जूगु दु ।
न्याय मन्त्रालयं मृत्युदण्डया सजाँय कार्यान्वयन यायेगु घोषणा याःगु खः । महान्यायाधिवक्ता विलियम बारं अमेरिकाया “ब्यूरो अफ प्रिजन्स” बिओपीयात न्याम्ह कैदीयात मृत्युदण्डया तिथि क्वःछीत निर्देशन ब्यूगु दु ।
मस्त नापं ज्याथःपिन्त स्याःगुलिसें बलात्कारया मुद्दाय् दोषी ठहर जूपिं न्याम्ह कैदीयात मृत्युदण्डया सजाँय बीत्यंगु न्याय मन्त्रालययात उद्धृत यासें बिविसीं न्ह्यथंगु दु ।
उमित वइगु डिसेम्बर व सन् २०२०या जनवरीइ मृत्युदण्ड बीगु न्ह्यथंगु दु ।
आप्रवासीत च्वनावंगु डुंगा दुंबलय् ११५म्ह बेपत्ता
लहना न्यूज | ने.सं. ११३९ दिल्लागा नवमि (२६ जुलाइ, २०१९), शुक्रवाः
लिबियाया तटीय लागाय् आप्रवासीत च्वनावंगु डुंगा दुंबलय् ११५म्ह बेपत्ता जूगु दु ।
तटीय लागाय् दुंपिं मध्ये १३४म्हेसिगु उद्धार याःगु उद्धारय् दुथ्याःपिं नौसेनिक अधिकारीया धापू दु ।
अफ्रिकी नापं अरवी देशया १५०म्ह च्वनावंगु उगु डुंगा तटीय लागापाखें ८गू किलोमिटर तापाक्क दुंगु उम्ह अधिकारीयात उद्धृत यासें विविसीं न्ह्यथंगु दु ।
राष्ट्रसंघीय शरणाथीै नियोग यूएनएचसीआरं थुगु घटनायात भूमध्यसागरय् थुगुसी जूगु तःधंगु पानीजहाज दुर्घटना धाःगु दु ।
हिंसा , राजनीतिक अस्थिरता व न्हियांन्हिथंया जीवन यापनया नितिं समस्या जुइवं थीथी अफ्रिकी व अरवी देशया आप्रवासीत भूमध्यसागर जुयाः अबैधकथं यूरोप दुहां वनेगु याः । गुकिया नितिं लिबिया मू लँपु जुया वयाच्वंगु दु । थ्व हे झ्वलय् दँय्दसं थजाःगु घटना जुया वयाच्वंगु दु ।
सन् २०१९या न्हापांगु प्यलाया दुने जक उकथं यात्रा यायेगु झ्वलय् समुन्द्रय् दुनाः १६४म्ह सीधुंकूगु यूएनएचसीआरया तथ्याङ्क दु ।
राष्ट्रपति ट्रम्पया धापूयात कयाः भारतपाखें खण्डन
लहना न्यूज | ने.सं. ११३९ दिल्लागा षष्ठि (२३ जुलाइ, २०१९), मंगलवाः
पाकिस्तानया प्रधानमन्त्री इमरान खान व अमेरिकाया राष्ट्रपति डोनाल्ड ट्रम्प दथुइ नापलानाः खँल्हाबल्हा यानादीगु दु ।
अमेरिका भ्रमणय् दुम्ह पाकिस्तानी प्रधानमन्त्री खानं ह्वाइट हाउसय् अमेरिकी राष्ट्रपति ट्रम्पलिसे नापलानाः खँल्हाबँल्हा यानादीगु खः । नापलायेगु झ्वलय् ट्रम्पं भारत व पाकिस्तान दथुइ ताःई न्ह्यःनिसें न्ह्यानाच्वंगु काश्मिर मुद्दा सम्बन्धय् तसकं प्राथमिकता बियाः च्यूताः क्यनादीगु खः ।
थ्व हे झ्वलय् राष्ट्रपति ट्रम्पं भारतया प्रधानमन्त्री नरेन्द्र मोदीं काश्मिर मुद्दाय् मध्यस्थता यानादीत थःत इनाप यानादीगु खः उकिया नितिं थः तयार जूगु प्रतिकृया बियादीगु खः । अथेखःसां ट्रम्पया उगु धापूयात भारतं खण्डन याःगु दु ।
भारतीय विदेश मन्त्रालयया प्रवक्ता रवीश कुमारं ट्वीट यानादिसें राष्ट्रपति ट्रम्पं मंकाः पत्रकार सम्मेलनय् बियादीगु उगु प्रतिकृयाया खँय् भारत अनविज्ञ जूगु न्ह्यथनादिल । प्रधानमन्त्री मोदीं उगु सम्बन्धय् ट्रम्पलिसे छुं नं कथंया अजाःगु सहलह मयाःगु नं न्ह्यथनादीगु दु । भारतं पाकिस्तानलिसे न्ह्याथें जाःगु मुद्दाय् नं वार्ता यायेफइगु तर उकिया नितिं पाकिस्तानं आतंकवादलिसे सम्बन्धित फुक्क ज्याखँ मदयेका छ्वयेमाःगु प्रवक्ता रवीश कुमारं धयादीगु दु ।
