Display Style:
Column Style
सिरियाय् युद्धविरामया ग्वसाः ताःमलात
लहनान्युज | ने.सं. ११३८ चिल्लाथ्व अष्टमि, (२३ फेब्रुअरी २०१८)
सिरियाया विद्रोहीतय्सं नियन्त्रण यानातःगु पूर्वी क्षेत्र गुटाय् सरकारी सेनां न्ह्याका वयाच्वंगु युद्ध अन्त्य याकेगु संयुक्त राष्ट्रसंघया कुतः ताःमलात ।
मानवीय ग्वाहालिया नितिं सिरियाय् युद्धविराम याकेगु सुरक्षा परिषदय् न्ह्यब्वःगु प्रस्तावय् रुसं असहमति क्यनेवं कुतः ताःमलाःगु खः ।
कुवेत व स्वीडेनं सिरियाय् म्होतिं लच्छिया नितिं युद्धविराम यायेगु प्रस्ताव तःगु खः ।
संयुक्त राष्ट्रसंघया नितिं रुसी राजदूत भसिली नेवेन्जियां सुरक्षा परिषदय् न्ह्यब्वःगु उगु प्रस्तावयात कयाः भिंकेमाःगु अडान कायेवं युद्धविरामयात कयाः सहमति जुइमफूगु खः । नवेन्जियां थःपिन्सं प्रस्तावय् छुं छुं संशोधन यायेत माग याःगुलिं तत्कालया नितिं सहमति मजूगु स्पष्ट यानादीगु बिबिसीं न्ह्यथंगु दु ।
रुसया अडानयात कयाः अन्तर्राष्ट्रिय जगतं प्रत्यक्षकथं सिरियाली सरकारया समर्थन व युद्धविरामयात छुं ई लिछ्यायेगु रणनीतिकथं व्याख्या याःगु दु ।
विद्रोहीतय्सं नियन्त्रण यानातःगु गुटा क्षेत्रय् छुं दिं न्ह्यःनिसें सरकारी सेनां यानाच्वंगु बमबारीया हुनिं नसा ज्वलं, लः, मतलिसें अत्यावश्यक ज्वलंया तसकं अभाव जूगु धासें तत्काल मानवीय ग्वाहालिया नितिं युद्धविराम यायेमाःगु खँय् राष्ट्रसंघं बः बिया वयाच्वंगु दु ।
सुरक्षा परिषदय् उगु प्रस्ताव पारित जूगु जूसा ७२घौ लिपानिसें युद्धविराम लागू जुइगु प्रावधान मस्यौदाय् न्ह्यथनातःगु दु । लिपांगु आक्रमणय् लानाः गुटा लागाय् ४सःम्ह स्वयां अप्वः सीधुंकूगु दु । उगु लागाय् थ्यंमथ्यं ४गू लख सर्वसाधारण विद्रोहीतय्गु घेराबन्दीइ लानाच्वंगु राष्ट्रसंघं न्ह्यथंगु दु ।
नवाज शरीफयात पाटीया नेतृत्व यायेत अयोग्य ठहर
लहनान्युज | चिल्लाथ्व सप्तमी ११३८ (फेब्रुअरी २२ २०१८)
पाकिस्तानया सर्वोच्च अदालतं पूर्वप्रधानमन्त्री नवाज शरीफयात पाटीया नेतृत्व यायेत अयोग्य ठहर याःगुु दु । पार्टी अध्यक्ष पदया जुगु इलय् नवाज शरीफं याःगु निर्णय नं अमान्य जुुगु धकाः सर्वोच्चं निर्णय याःगु दु ।
नवाज शरीफ सत्ताधारी पाकिस्तान मुस्लिम लीग–नवाज (पीएमएल–एन) या संस्थापक नाप पार्टीया अध्यक्ष न खः ।
सर्वोच्चं पनामा पेपर लिक्स प्रकरणय् दोषी ठहर यासें सरकारया नेतृत्व यायेत अयोग्य जुगु धकाः फैसलां वःगु र्दँ जुलाई महिनाय् नवाज शरीफं प्रधानमन्त्री पद त्याग याःगु खःसा पाटीया नेतृत्व धाःसा त्याग मयागु खः ।
शरीफं थः बिरुद्ध राजनीतिक षडयन्त्र जुया च्वंगु धकाः दावी याना वया च्वंगु खः । पाकिस्तानया क्वयाःगु सदन नेशनल एसेम्ब्लीय् नवाजया पार्टीया बहुमत दु । आः वइगु दँय जुइगु् चुनावय्
संसदय् सरिफया पाटीं बहुमत हइगु अनुमान याना च्वंगु इलय् सर्वोच्चया थुगु फैसला वःगु खः ।
सर्वोच्चया थुगु फैसला धुकां शरीफ नेतृत्वया पार्टीं आन्तरिक छलफल यानाच्वंगु दु ।
बम्प–स्टकयात प्रतिबन्ध याय्माःगु : राष्ट्रपति ट्रम्प
लहनान्युज | ने.सं. ११३८ चिल्लाथ्व चौथी, (२१ फेब्रुअरी २०१८) बुधबार
अमेरिकी राष्ट्रपति डोनाल्ड ट्रम्पं बम्प–स्टक बन्दुक छ्यलाबुलाय् हयेदइगु कानूनय् कडाइ यायेत निर्देशन बियादीगु दु । खास यानाः बम्प–स्टक (अर्धस्वचालित राइफलपाखें छगू हे मिनेटय् सलंसः गोली कयेकेफइगु उपकरण)यात प्रतिबन्ध तयेमाःगु राष्ट्रपति ट्रम्पं धयादीगु दु ।
ह्वाइटहाउसय् न्ववानादिसें राष्ट्रपति ट्रम्पं थ्व सम्बन्धी कानून दय्केत कानून मन्त्रालययात निर्देशन बीधुंकूगु नं जानकारी बियादिल ।
उगु बन्दुक अमेरिकाय् थ्यंमथ्यं सच्छि डलरय् न्यायेफइ ।
थुगु उपकरण छ्यलाः छम्ह बन्दुकधारीं थगुने लसभेगासय् ५८म्ह मनूत स्याःगु खःसा नकतिनि हे जक छगू ब्वनेकुथी बन्दुकधारीं आक्रमण याःगु इलय् १७म्ह सीगु खः ।
ब्वनेकुथिया ब्वँमिपिन्त निशाना दयेकेवं अमेरिकाय् बन्दुक तयेके बीगु वा मबीगु धइगु विषयस बहस जूगु दु ।
रिपब्लिकन राष्ट्रपति ट्रम्पं ब्वनेकुथिया सुरक्षायात उच्च प्राथमिकता बियादीगु दु ।
डिभी चिठ्ठा विधेयक अमेरिकी संसदं अस्वीकृत
लहनान्युज | चिल्लाथ्व पारु ११३८ (फ्रेअवरी १६ २०१८)
डिभी चिठ्ठा नाप मेगु प्यंगु विषयया विधेयक अमेरिकी संसदं अस्वीकृत याःगु दु ।गुकिइ अमेरिकाय् अवैध रुप वपि आप्रवासीया सुरक्षा न खः ।
अमेरिकाया च्वयेयाःगु सदनं डिभी चिठ्ठा बन्द याःगु, ल्यायम्हपि आप्रवासन, सीमा सुरक्षाया खँय् या विधेयकयात अस्वीकृत याःगु दु । सीमा सुरक्षा व नियमनाप सम्वन्धित डाका विधेयक निगुपक्षीय समर्थनय् पेस याःगु खः ।
अथेहे थुकिइ यात अमेरिकी राष्ट्रपति डोनाल्ड ट्रम्पं आलोचना याःगु दु । ट्रम्पं भिटो तकं छ्यलिगु जुइ धकाः ख्याच्वं न बिगु दु ।
डिभी चिठ्ठा ज्याझ्वः कथं हरेक दँय् ५० द्धः मल्याकः अमेरिकाय् वनाच्वंगु दु ।
थुके याना छु भचा नेपाःमि पिन्त राहत जुगु दु । डीभी लाना अमेरिका वनिपिं बिदेशीमध्यय् नेपाःमि पिं दकलय् न्ह्यःने लाः ।
डीभी भिसा नीतिइ कडा यायेगु घोषणा
लहनान्युज | सिल्लागा पारु ११३८ (फ्रेअवरी १ २०१८)
अमेरिकाया राष्ट्रपति डोनाल्ड ट्रम्पं डीभी भिसा बन्द यायेगु व परिवारया सदस्यपिन्त प्रायोजन याना अमेरिकाय् यंके दइगु नीतिइ कडा यायेगु घोषणा या वं दकलय् अप्व नेपाली तयेत लायगु जुगु दु ।
राष्ट्रपति ट्रम्पं नकतिनि हे स्टेट अफ दि युनियनय् न्ववासें डीभी भिसा बन्द यासें योग्यता व क्षमताया आधारय् जकः विदेशी तयेत अमेरिकाय् अवसर बिगु नीति हयेगु घाषणा याःगु दु ।
अथेहे डीभी लापिन्त अमेरिकाया नागरिक जुइ धुकुपि आप्रवासी तयेत थःपिनिगु परिवारया सदस्य याःगु प्रायोजन यासें अमेरिकाय् यंकेइगु नीतियात नं कडायायेगु धाःगु दु।
हरेक दँय् ५० द्धःया ल्याखय् डीभी लापिं नेपालीया ल्याः प्यद्धः या हाराहारी थ्यं ।
ट्रम्प प्रशासनं अमेरिकी कंग्रेसय् डीभी चिठ्ठा प्रणाली बन्द यायेयु विधेयक पेस याये धुकुगु दु । थुगु विधेयक पारित जुल धासा डीभी भिसा आवेदन न्ह्याबलय् या लागि बन्द जुइ ।
