Display Style:
Column Style
श्रीदेवी ५४ दँय् मन्त
लहनान्युज | सिल्लाथ्व दशमी ११३८ (फेब्रुअरी २५ २०१८)
बलिउडया लोकंह्वाःम्ह नायिका श्रीदेवी म्हिगः ५४ दँय् दुबइलय् हृदयघात जुया मन्त ।
बोनी कपुर व चीधिकःम्ह म्ह्याय् छगू ब्याहा ज्याझ्वलय् सहभागी जुइत दुबइ वंगु खः ।
श्रीदेवीया जन्म १३ अगष्ट १९६३ स तमिलनाडुइ जूगु खः ।
श्रीदेवीं प्यदँया दुगु इलय् मचाकलाकारया रुपं संकिपा ‘थनिवान’पाखे निसें संकिपाय् ख्यलय् दुहावःगुखः ।
श्रीदेवीं सन् १९९६ य् निर्माता बोनी कपुरनाप ब्याहा याःगु खः । संकिपा मिस्टर इण्डिया सन् १९८७ या सुटिङया झ्वलय् बोनीकपुर व श्रीदेवीया मतिनाया स्वापू जूगु खः । श्रीदेवीया निम्ह म्ह्याय् जान्ह्वी व खुशी दु ।
श्रीदेवीयाःगु फिल्मी करियर १९७८ य् ‘सोलहवां सावन’ सकिपा न्ह्याःगु ख्यलय् याःगु खः। उगु इलय् हिम्मतवाला, मवाली, तोहफा, नगीना, आखिरी रास्ता, कर्मा, मिस्टर इन्डिया व चाँदनी
थे ज्याःगु संकिपालय् म्हितुगु खः ।
अफगानिस्तानय् सैन्य पोष्टय् आक्रमण, २२ म्ह सित
लहनान्युज | ने.सं. ११३८ चिल्लाथ्व नवमि (२४ फेब्रुअरी २०१८)
अफगानिस्तानया पश्चिमी क्षेत्रय् च्वंगु फराह प्रान्तय् तालिवान लडाकुतय्सं सैन्य पोष्टय् आक्रमण याःगु इलय् २२म्ह सेनालिसें २५म्ह सीगु दु ।
तालिवान लडाकुतय्सं सरकारी सुरक्षा फौजया चेकपोष्टयात अचानक आक्रमण याःगु अफगानिस्तानया रक्षा मन्त्रालययात उद्दृत यासें अन्तर्राष्ट्रिय सञ्चारमाध्यमं न्ह्यथंगु दु ।
घटनाया जिम्मेवारी तालिवान व जिहादी निगुलिं पुचलं काःगु दु । लडाकुतय्सं थःपिनिगु ल्वाभःतकं लाका कया यंकूगु अफगान सेनां न्ह्यथंगु दु ।
थ्व हे दथुइ अफगानिस्तानया राजधानी काबुलय् आत्मघाती बम विस्फोट जूगु इलय् स्वम्ह सीगु दुसा छम्ह घाःपाः जूगु दु ।
लिपांगु इलय् सेनायात लक्षित यासें अफगानिस्तानय् आक्रमणया घटना अप्वया वंगु दु
सिरियाय् युद्धविरामया ग्वसाः ताःमलात
लहनान्युज | ने.सं. ११३८ चिल्लाथ्व अष्टमि, (२३ फेब्रुअरी २०१८)
सिरियाया विद्रोहीतय्सं नियन्त्रण यानातःगु पूर्वी क्षेत्र गुटाय् सरकारी सेनां न्ह्याका वयाच्वंगु युद्ध अन्त्य याकेगु संयुक्त राष्ट्रसंघया कुतः ताःमलात ।
मानवीय ग्वाहालिया नितिं सिरियाय् युद्धविराम याकेगु सुरक्षा परिषदय् न्ह्यब्वःगु प्रस्तावय् रुसं असहमति क्यनेवं कुतः ताःमलाःगु खः ।
कुवेत व स्वीडेनं सिरियाय् म्होतिं लच्छिया नितिं युद्धविराम यायेगु प्रस्ताव तःगु खः ।
संयुक्त राष्ट्रसंघया नितिं रुसी राजदूत भसिली नेवेन्जियां सुरक्षा परिषदय् न्ह्यब्वःगु उगु प्रस्तावयात कयाः भिंकेमाःगु अडान कायेवं युद्धविरामयात कयाः सहमति जुइमफूगु खः । नवेन्जियां थःपिन्सं प्रस्तावय् छुं छुं संशोधन यायेत माग याःगुलिं तत्कालया नितिं सहमति मजूगु स्पष्ट यानादीगु बिबिसीं न्ह्यथंगु दु ।
रुसया अडानयात कयाः अन्तर्राष्ट्रिय जगतं प्रत्यक्षकथं सिरियाली सरकारया समर्थन व युद्धविरामयात छुं ई लिछ्यायेगु रणनीतिकथं व्याख्या याःगु दु ।
विद्रोहीतय्सं नियन्त्रण यानातःगु गुटा क्षेत्रय् छुं दिं न्ह्यःनिसें सरकारी सेनां यानाच्वंगु बमबारीया हुनिं नसा ज्वलं, लः, मतलिसें अत्यावश्यक ज्वलंया तसकं अभाव जूगु धासें तत्काल मानवीय ग्वाहालिया नितिं युद्धविराम यायेमाःगु खँय् राष्ट्रसंघं बः बिया वयाच्वंगु दु ।
सुरक्षा परिषदय् उगु प्रस्ताव पारित जूगु जूसा ७२घौ लिपानिसें युद्धविराम लागू जुइगु प्रावधान मस्यौदाय् न्ह्यथनातःगु दु । लिपांगु आक्रमणय् लानाः गुटा लागाय् ४सःम्ह स्वयां अप्वः सीधुंकूगु दु । उगु लागाय् थ्यंमथ्यं ४गू लख सर्वसाधारण विद्रोहीतय्गु घेराबन्दीइ लानाच्वंगु राष्ट्रसंघं न्ह्यथंगु दु ।
नवाज शरीफयात पाटीया नेतृत्व यायेत अयोग्य ठहर
लहनान्युज | चिल्लाथ्व सप्तमी ११३८ (फेब्रुअरी २२ २०१८)
पाकिस्तानया सर्वोच्च अदालतं पूर्वप्रधानमन्त्री नवाज शरीफयात पाटीया नेतृत्व यायेत अयोग्य ठहर याःगुु दु । पार्टी अध्यक्ष पदया जुगु इलय् नवाज शरीफं याःगु निर्णय नं अमान्य जुुगु धकाः सर्वोच्चं निर्णय याःगु दु ।
नवाज शरीफ सत्ताधारी पाकिस्तान मुस्लिम लीग–नवाज (पीएमएल–एन) या संस्थापक नाप पार्टीया अध्यक्ष न खः ।
सर्वोच्चं पनामा पेपर लिक्स प्रकरणय् दोषी ठहर यासें सरकारया नेतृत्व यायेत अयोग्य जुगु धकाः फैसलां वःगु र्दँ जुलाई महिनाय् नवाज शरीफं प्रधानमन्त्री पद त्याग याःगु खःसा पाटीया नेतृत्व धाःसा त्याग मयागु खः ।
शरीफं थः बिरुद्ध राजनीतिक षडयन्त्र जुया च्वंगु धकाः दावी याना वया च्वंगु खः । पाकिस्तानया क्वयाःगु सदन नेशनल एसेम्ब्लीय् नवाजया पार्टीया बहुमत दु । आः वइगु दँय जुइगु् चुनावय्
संसदय् सरिफया पाटीं बहुमत हइगु अनुमान याना च्वंगु इलय् सर्वोच्चया थुगु फैसला वःगु खः ।
सर्वोच्चया थुगु फैसला धुकां शरीफ नेतृत्वया पार्टीं आन्तरिक छलफल यानाच्वंगु दु ।
बम्प–स्टकयात प्रतिबन्ध याय्माःगु : राष्ट्रपति ट्रम्प
लहनान्युज | ने.सं. ११३८ चिल्लाथ्व चौथी, (२१ फेब्रुअरी २०१८) बुधबार
अमेरिकी राष्ट्रपति डोनाल्ड ट्रम्पं बम्प–स्टक बन्दुक छ्यलाबुलाय् हयेदइगु कानूनय् कडाइ यायेत निर्देशन बियादीगु दु । खास यानाः बम्प–स्टक (अर्धस्वचालित राइफलपाखें छगू हे मिनेटय् सलंसः गोली कयेकेफइगु उपकरण)यात प्रतिबन्ध तयेमाःगु राष्ट्रपति ट्रम्पं धयादीगु दु ।
ह्वाइटहाउसय् न्ववानादिसें राष्ट्रपति ट्रम्पं थ्व सम्बन्धी कानून दय्केत कानून मन्त्रालययात निर्देशन बीधुंकूगु नं जानकारी बियादिल ।
उगु बन्दुक अमेरिकाय् थ्यंमथ्यं सच्छि डलरय् न्यायेफइ ।
थुगु उपकरण छ्यलाः छम्ह बन्दुकधारीं थगुने लसभेगासय् ५८म्ह मनूत स्याःगु खःसा नकतिनि हे जक छगू ब्वनेकुथी बन्दुकधारीं आक्रमण याःगु इलय् १७म्ह सीगु खः ।
ब्वनेकुथिया ब्वँमिपिन्त निशाना दयेकेवं अमेरिकाय् बन्दुक तयेके बीगु वा मबीगु धइगु विषयस बहस जूगु दु ।
रिपब्लिकन राष्ट्रपति ट्रम्पं ब्वनेकुथिया सुरक्षायात उच्च प्राथमिकता बियादीगु दु ।
