Display Style:
Column Style
प्रशिद्ध बेलायती बैज्ञानिक स्टेफन हकिङ मन्त
ने.सं. ११३८ चिल्लागा १२ (१४ मार्च २०१८), बुधवाः
प्रशिद्ध बेलायती बैज्ञानिक स्टेफन हकिङ ७६दँया बैंशय् थौं बुधवाः मन्त । भौतिक विज्ञान शास्त्रपाखे प्रख्यात हकिङ बेलायतया राजधानी लण्डनय् च्वंगु थःगु हे छेँय् मदुगु पारिवारीक श्रोतयात उद्धृत यासें बिबिसीं न्ह्यथंगु दु ।
विश्व प्रसिद्ध “अ ब्रिफ हिस्ट्री अफ टाइम” सफूया च्वमि तकं जुयादीम्ह हकिङ सापेक्षवादया सिद्धान्त व ब्ल्याक होलयात कयाः न्हून्हूगु तथ्य पितहःम्ह विख्यात वैज्ञानिककथं कयातःगु दु ।
सन् १९४२य् बूम्ह हकिङ भौतिक विज्ञानया ज्ञाता जक मखु, क्याम्ब्रिज विश्वविद्यालयस सैद्धान्तिक ब्रम्हाण्ड विज्ञान केन्द्रया शोध निर्देशकतकं जुयादी ।
सन् १९६३ स २१दँया बैंशय् मोर्टन न्यूरोन ल्वय् जूगु सीधुंकाः वय्कःयात चिकित्सकपिन्सं २दँ जक म्वाइगु धाःगु खः । तर चिकित्सकीय धापूया हाथ्याः ब्यूसें हकिङ बागू शताब्दी स्वयां अप्वः म्वायेत ताःलात ।
सन् १९५९स अक्सफोर्ड विश्वविद्यालयस ‘नेचुरल साइन्स’ ब्वनेत ह्वःताः दयेधुंकाः वय्कलं क्याम्ब्रिजपाखें विद्यावारिधी यानादीगु खः । सन् १९४७ य् वय्कलं ब्ल्याक होल सम्बन्धी सिद्धान्त ‘हकिङ रेडियसन’ प्रतिपादन यानादीगु खः ।
सन् १९८८स पिदंगु हकिङया सफू ‘अ ब्रिफ हिस्ट्री अफ टाइम’ १गू करोड स्वयां अप्वः चुइधुंकूगु दु । वय्कःया जीवनीयात कयाः सन् २०१४स ‘द थ्योरी अफ एभ्रीथिङ्ग’ नांया संकिपा तकं पिहां वयेधुंकूगु दु ।
रुसया नियत व ज्याखँयात कयाः लिसः बीमाःगु टिलरसनया धापू
ने.सं. ११३८ चिल्लागा १२ (१४ मार्च २०१८), बुधवाः
अमेरिकी विदेशमन्त्री पदपाखें बर्खास्त जुयादीम्ह रेक्स टिलरसनं चीनलिसे स्वापू भिनावंगु नापं उत्तर कोरियाया आणविक निशस्त्रीकरण क्षेत्रय् सकारात्मक ज्या जुयाच्वंगु धयादीगु दु ।
राष्ट्रपति डोनाल्ड ट्रम्पं पदपाखें बर्खास्त यायेधुंकाः सञ्चारकःमिलिसे खँल्हानादिसें टिलरसनं चीन व उत्तर कोरियालिसेया स्वापू भिंकेगु नितिं कुतः जुयाच्वंगु धयादीगु खः ।
अथे हे रुस सरकारपाखें जुयाच्वंगु दुःख बीगु नियत व ज्याखँया धाःसा धिसिलाक्क लिसः बीमाःगु नं टिलरसनं धयादिल ।
रुसं समग्र रुसी नागरिक व विश्वया हे हीतयात ध्यानय् तयाः ज्या यायेमाःगु वय्कःया धापू खः ।
राष्ट्रपति ट्रम्पलिसे ब्यक्तिगत व नीतिगत मतभेदयात कयाः टिलरसनया राजीनामाया खँ न्हापानिसें चर्चाय् वयाच्वंगु खः । तर अचानक व अपमानजनक तरीकां टिलरसनयात याःगु बर्खास्तीं वासिङ्गटनयात तकं स्तब्ध दयेकूगु बिबिसीं न्ह्यंगु खः ।
थ्व हे झ्वलय् न्हूम्ह विदेशमन्त्रीइ संघीय गुप्तचर निकाय सीआइएया निर्देशक माइक पोम्प्यो नियुक्त जुयादीगु दु ।
ट्रम्पया आर्थिक सल्लाहकारपाखें राजीनामा
लहनान्युज | ने.सं. ११३८ चिल्लागा षष्ठी (७ फेब्रुअरी २०१८)
अमेरिकी राष्ट्रपति डोनाल्ड ट्रम्पया मुख्य आर्थिक सल्लाहकार गेरी कोनं राजीनामा बियादीगु दु । ५७दँ दुम्ह कोन ट्रम्प प्रशासनय् राजीनामा बियादीम्ह आःतकया हे उच्च ओहोदाया कर्मचारी जूगु नं बिबिसीं न्ह्यथंगु दु ।
स्वतन्त्र ब्यापार नीतिया पक्षधर कोनं राष्ट्रपति ट्रम्पया लिपांगु ब्यापार योजनायात कयाः असन्तुष्टिया हुनिं राजीनामा बियादीगु अमेरिकी सञ्चारमाध्यमं न्ह्यथंगु दु ।
एल्मुनियम व स्टीलया सामानया आयातय् कर अप्वयेकेगु राष्ट्रपति ट्रम्पया योजनाया विपक्षय् दुम्ह कोनं ट्रम्प प्रशासनय् ज्या यायेदुगुलिं थः लय्ताःगु नं न्ह्यथनादीगु दु ।
थ्व हे झ्वलय् राष्ट्रपति ट्रम्पं ट्वीट यासें याकनं हे न्हूम्ह आर्थिक सल्लाहकार नियुक्तत यायेगु धयादीगु दु ।
ट्रम्प प्रशासनया लिपांगु क्वःछिनां अर्थतन्त्रय् तःधंगु ‘धक्का’ लाःगु धासें उकियात कयाः छचाखेरं कुंखिनाहःगु दु ।
श्रीदेवी ५४ दँय् मन्त
लहनान्युज | सिल्लाथ्व दशमी ११३८ (फेब्रुअरी २५ २०१८)
बलिउडया लोकंह्वाःम्ह नायिका श्रीदेवी म्हिगः ५४ दँय् दुबइलय् हृदयघात जुया मन्त ।
बोनी कपुर व चीधिकःम्ह म्ह्याय् छगू ब्याहा ज्याझ्वलय् सहभागी जुइत दुबइ वंगु खः ।
श्रीदेवीया जन्म १३ अगष्ट १९६३ स तमिलनाडुइ जूगु खः ।
श्रीदेवीं प्यदँया दुगु इलय् मचाकलाकारया रुपं संकिपा ‘थनिवान’पाखे निसें संकिपाय् ख्यलय् दुहावःगुखः ।
श्रीदेवीं सन् १९९६ य् निर्माता बोनी कपुरनाप ब्याहा याःगु खः । संकिपा मिस्टर इण्डिया सन् १९८७ या सुटिङया झ्वलय् बोनीकपुर व श्रीदेवीया मतिनाया स्वापू जूगु खः । श्रीदेवीया निम्ह म्ह्याय् जान्ह्वी व खुशी दु ।
श्रीदेवीयाःगु फिल्मी करियर १९७८ य् ‘सोलहवां सावन’ सकिपा न्ह्याःगु ख्यलय् याःगु खः। उगु इलय् हिम्मतवाला, मवाली, तोहफा, नगीना, आखिरी रास्ता, कर्मा, मिस्टर इन्डिया व चाँदनी
थे ज्याःगु संकिपालय् म्हितुगु खः ।
अफगानिस्तानय् सैन्य पोष्टय् आक्रमण, २२ म्ह सित
लहनान्युज | ने.सं. ११३८ चिल्लाथ्व नवमि (२४ फेब्रुअरी २०१८)
अफगानिस्तानया पश्चिमी क्षेत्रय् च्वंगु फराह प्रान्तय् तालिवान लडाकुतय्सं सैन्य पोष्टय् आक्रमण याःगु इलय् २२म्ह सेनालिसें २५म्ह सीगु दु ।
तालिवान लडाकुतय्सं सरकारी सुरक्षा फौजया चेकपोष्टयात अचानक आक्रमण याःगु अफगानिस्तानया रक्षा मन्त्रालययात उद्दृत यासें अन्तर्राष्ट्रिय सञ्चारमाध्यमं न्ह्यथंगु दु ।
घटनाया जिम्मेवारी तालिवान व जिहादी निगुलिं पुचलं काःगु दु । लडाकुतय्सं थःपिनिगु ल्वाभःतकं लाका कया यंकूगु अफगान सेनां न्ह्यथंगु दु ।
थ्व हे दथुइ अफगानिस्तानया राजधानी काबुलय् आत्मघाती बम विस्फोट जूगु इलय् स्वम्ह सीगु दुसा छम्ह घाःपाः जूगु दु ।
लिपांगु इलय् सेनायात लक्षित यासें अफगानिस्तानय् आक्रमणया घटना अप्वया वंगु दु
